Read Batak Karo MASMUR 106 Bible Online

MASMUR 106 - Batak Karo bible

MASMUR 106

¹Pujilah TUHAN! Kataken bujur man baNa, sabap mehuli kap Ia. Keleng atena tetap rasa lalap. [147†]

²Ise ngasup nuriken perbahanenNa si mbelin, dingen mereken pujin si patut man baNa?

³Malem kal ate kalak si ngikutken perentah-perentahNa, kalak si katawari pe ngelakoken si benar.

⁴O TUHAN, inget aku tupung Kam mulahi bangsaNdu, aku pe ikut min isampatiNdu.

⁵Bere maka kuidah kesangapen bangsaNdu, dingen ermeriah ate ras bangsaNdu. Bere maka megah ateku, radu ras kalak pilihenNdu.

⁶Bali ras nini-nini kami, kami pe enggo erdosa, enggo kami erbahan salah dingen jahat.

⁷Nini-nini kami i taneh Mesir la ngerti perbahanenNdu si mejin la ia nggit ngantusisa. Lupa ia nandangi keleng ateNdu si rusur icidahkenNdu, si Meganjangna ilawanna i deher Lawit Merah. [148†]

⁸Tapi ikeliniNdu ia erkiteken gelarNdu maka tangkas teridah kinimbisanNdu.

⁹Kam si merentahkenca maka kerah Lawit Merah, bangsaNdu erdalan arah e, i babo taneh si kerah. [149†]

¹⁰E maka pulah ia i bas tan kalak si erelem-elem man bana, i bas kuasa imbang-imbangna nari, ibebaskenNdu ia.

¹¹Imbang igedapken ku lau; sekalak pe la lit si pulah.

¹²Jenari maka tek bangsaNdu man padanNdu dingen ngendeken ende-enden pujin man baNdu. [150†]

¹³Tapi pedas kal ia lupa perbahanen si enggo ibahanNdu, ilakokenna kai atena ibahanna, alu la mindo ajarNdu.

¹⁴I gurun pasir ikuasai kerincuhen ia, e maka icubaina Kam, o Dibata. [151†]

¹⁵E maka iberekenNdu pemindonNa; tapi iberekenNdu ka nge penakit si mejin man baNa.

¹⁶I bas perkemahen e mecimberu ia man Musa ras man suruh-suruhenNdu si badia e me Harun. [152†]

¹⁷E maka ibendut doni enda si Datan, Abiram ras keluargana pe ikut tertanem.

¹⁸Nusur api, isilamna si ngkapiti kalak enda, raci kerina kalak si enggo erbahan jahat.

¹⁹Ibanna anak lembu i Sinai, jenari isembahna gana-gana e. [153†]

²⁰Itulakna Kam Dibata si mulia, lako nembah gana-gana rubia-rubia si nggagat dukut.

²¹Lupa ia nandangi Dibata si enggo mulahi ia, alu ngelakoken perbahanen si mbelin i Mesir.

²²Tuhu mejin kal perbahanen TUHAN i je, tuhu mbelin kal perkara-perkara si ibahanNa i Lawit Merah.

²³E me sabapna maka ikernepkenNdu ateNdu bangsaNdu, tapi Musa kalak pilihenNdu e, ngolang-ngolangi Kam. Ngadap Musa man baNdu, mantak rawaNdu, e maka la ia kernep kerina.

²⁴Kenca bage itulakna taneh si mehuli e, erkiteken la ia tek padan si ipadankenNdu, o Dibata. [154†]

²⁵Ngadi ia i bas kemahna iherna jungut-jungut, la diatena megiken soraNdu.

²⁶E maka erpadan Kam alu ersumpah, maka mate me kalak enda i gurun pasir.

²⁷Mbencah me kesusurenna ku kalak si nembah berhala, jenari mate ia i negeri bangsa-bangsa. [155†]

²⁸I Peor isembahna Baal, dingen ipanna persembahen man kalak mate. [156†]

²⁹Erkiteken perbahanenna e, ipekekena me rawaNdu, o TUHAN, ipesusurNdu man bana penakit si mejin.

³⁰Tapi perban keke si Pinehas ngukum kalak si salah, ngadi me cilaka e.

³¹Perbahanenna e iergaken kalak, ersundut-sundut seh rasa lalap.

³²I sumbul Meriba, ipekeke kalak enda ka rawaNdu, erkiteken perbahanen kalak enda, Musa lit i bas kesusahen. [157†]

³³Pagit kal iakap Musa ibahan kalak enda, seh maka luar ranan si la iukurina leben.

³⁴Bangsa si nembah man berhala la ibunuh kalak enda, ilawanna perentah si ibereken TUHAN man bana. [158†]

³⁵Lebih asang si e, si empon ia ras kalak ah ndai, dingen iusihna perbahanen kalak si la erdibata e.

³⁶Jenari nembah bangsaNdu man berhala, janah e jadi siding man bana.

³⁷Anak-anakna si dilaki ras si diberu ipersembahkenna, man setan-setan kalak Kanaan. [159†]

³⁸Ibunuhina anak-anakna si la ersalah, erkiteken pembunuhen e keliamen me taneh. [160†]

³⁹Perbahanenna e ngeliami ia, la ia setia man Dibata.

⁴⁰BangsaNdu pekeke rawaNdu, ciga ateNdu ngenehen ia. [161†]

⁴¹E maka iendeskenNdu ia ku bas kuasa bangsa-bangsa si deban, ipediatNdu ia ikuasai musuhna.

⁴²Jenari itindas musuh e ia, dingen ikuasaina.

⁴³Piga-piga kali ipulahiNdu bangsaNdu, tapi madin kang akapna berontak, e maka reh bagesna ia ndabuh ku bas dosa.

⁴⁴Tapi tupung erlebuh ia bandu, TUHAN, ibegikenNdu, dingen iperdiatekenNdu kesusahenna.

⁴⁵Guna kiniulin man bana ingetNdu perpadanenNdu, dingen iubahNdu keputusenNdu sabap mbelin kap keleng ateNdu.

⁴⁶IkusurkenNdu ukur imbang-imbangna, gelah turah atena mekuah man kalak enda.

⁴⁷Pulahi min kami, o TUHAN Dibata kami, dingen baba kami mulihken i bas bangsa-bangsa enda nari, maka banci kami ngataken bujur, dingen muji gelarNdu si badia. [162†]

⁴⁸Pujilah TUHAN, Dibata Israel, genduari tetap seh rasa lalap, kerinalah kalak ngataken, “Amin!” Pujilah TUHAN.