Read Batak Karo MASMUR 107 Bible Online

MASMUR 107 - Batak Karo bible

MASMUR 107

¹“Katakenlah bujur man TUHAN erkiteken kiniulinNa. Keleng ateNa tetap rasa lalap.” [163†]

²Usur min ibelaskenndu o kam kerina si enggo ikeliniNa. Enggo ipulahiNa kam i bas imbang-imbangNdu nari.

³I bas negeri-negeri Timur ras Barat nari kam ipepulungNa, ipersada i Utara dingen i Selatan nari.

⁴Lit si papak i gurun pasir, la jumpa dalan ku kuta man inganna tading.

⁵Muas dingen melihe iakapna, enggo bene pengarapenna.

⁶I bas kiniseran e nari nderkuh ia man TUHAN, e maka ipulahi TUHAN ia i bas kepiceten nari.

⁷IbabaiNa ia arah dalan si pinter, ku bas sada kuta man inganna tading.

⁸Arus kalak enda tetap ngataken bujur man TUHAN, kerna keleng ateNa si tetap, dingen tanda-tanda kuasa si ilakokenNa man bana.

⁹Kalak muas itunggahina seh puas, alu si mehuli ibesurina si kelihen.

¹⁰Lit ia tading i bas kegelapen, igari dingen ipenjaraken,

¹¹erkiteken ilawanna perentah Dibata, erkiteken itulakna ajarenNa.

¹²E maka labuh ia erkiteken dahin si mberat, guling ia, la lit si nampatisa.

¹³Erkiteken kiniseranna, nderkuh ia man TUHAN, e maka ipulahi TUHAN ia i bas kepiceten nari.

¹⁴IpedaratNa ia i bas kegelapen nari; iripukkenNa garina.

¹⁵Erkiteken si e, arus kalak enda ngataken bujur, kerna keleng ateNa si tetap, dingen tanda-tanda kuasa si enggo ibahanNa.

¹⁶Pintu-pintu tembaga iruntuhkenNa, eruk-eruk besi iripukkenNa.

¹⁷Lit kalak motu, ngenanami kiniseran erkiteken dosa-dosana, bage pe erkiteken kejahatenna;

¹⁸ngenen pangan mutah atena, narus me mutus atena kesahna.

¹⁹I bas kiniseran e nari nderkuh ia man TUHAN, e maka ipulahiNa ia i bas kepiceten nari.

²⁰Alu perentahNa, ipepalemNa kalak enda, jenari ipulahiNa i bas kematen nari.

²¹Erkiteken si e arus kalak enda ngataken bujur, kerna keleng atena si tetap, dingen tanda-tanda kuasa si enggo ibahanNa.

²²Arus kalak enda ngataken bujur alu maba persembahen, alu ende-enden si meriah arus iberitakenna kerna perbahanen TUHAN.

²³Lit kalak erlayar alu kapal i babo lawit, ndarami nakan alu erbinaga.

²⁴Idahna uga perbahanen-perbahanen TUHAN, tanda-tanda kuasa si ilakokenNa i bas lawit.

²⁵Alu perentahNa, jadi me angin erpiu-piu, e maka jadi me galumbang si merawa.

²⁶Kapal terangkat meganjang ku das, jenari igedapken ku bas lawit si mbagesna. I bas paksa-paksa si bage, bene kinimbisan jelma.

²⁷Mbewat-mbewat dingen guling ia desken kalak mabuk, kerina kepentarenna la lit gunana.

²⁸I bas kiniseran e nari nderkuh ia man TUHAN, e maka ipulahiNa ia i bas kepiceten nari.

²⁹IpejenengNa angin si erpiu-piu, galumbang si merawa pe enggo sinik.

³⁰Meriah ukurna sabap enggo lit ketenengen, jenari ibabai TUHAN ia ku pelabuhen si itujuna.

³¹Erkiteken si e arus kalak enda ngataken bujur man TUHAN, kerna keleng ateNa si tetap, dingen tanda-tanda kuasa si enggo ibahanNa.

³²Arus kalak enda ermomo i tengah-tengah perpulungenNa kerna kinibelinen TUHAN, dingen muji Ia i bas runggun pertua-pertua.

³³ TUHAN erbahanca lau belin jadi kerah, ulu lau jadi taneh kerah.

³⁴Taneh si mehumur ibahanNa jadi taneh masin, erkiteken kejahaten si ilakoken kalak si ngianisa.

³⁵Gurun pasir isalihkenNa jadi tambak, taneh kerah isalihkenNa jadi ulu lau maler.

³⁶IpelepasNa kalak kelihen ringan i je, jenari ipanteki kalak e sada kuta man inganna tading.

³⁷Juma ierdangina janah isuanna batang anggur, si mereken ulih si seh kal buena.

³⁸Ipasu-pasu TUHAN bangsaNa gelah ertuah, dingen asuh-asuhenna tetap reh buena.

³⁹Tupung bangsa Dibata italuken dingen ipeteruk kalak, dem alu ate ceda ras itindih kalak,

⁴⁰ipeteruk TUHAN kalak si nindihsa, isuruhNa imbang-imbang bangsa e mampa-mampa i gurun pasir.

⁴¹Tapi ipulahiNa kalak musil i bas kiniseranna nari, jenari keluarga e tambah tambahiNa jadi nterem desken sada rarasen.

⁴²Kalak bujur ngidah si e, e maka meriah ukurna, tapi kalak jahat isompel babahna.

⁴³Ipekusur-kusur kalak si pentar enda kerina i bas ukurna, iakuinalah keleng ate TUHAN si tetap e.