Read Batak Karo MASMUR 109 Bible Online

MASMUR 109 - Batak Karo bible

MASMUR 109

¹Masmur Daud. Kupuji Kam, o Dibata, ola Kam sinik saja.

²Kalak jahat ras kalak penipu nerang aku, ibelaskenna ranan la tuhu kerna aku.

³Irawaina aku alu ngataken kata si jahat, alu la ersebap iserangna aku.

⁴Aminna pe keleng ateku ia dingen kutotoken ia, bage pe nembeh kang atena aku.

⁵Kiniulinku ibalasna alu kejahaten, keleng ateku iulihkenna alu nembeh ate.

⁶Berelah kalak jahat ngadili imbangku e, gelah imbangna jine ngaduken ia.

⁷Pelepas ia ipereksa gelah terdat kesalahenna, pelepas pertotonna pe nambahi dosana.

⁸Wari-wari kegeluhen pedas min peltep, jabatenna pe man kalak si deban. [166†]

⁹Melumanglah anak-anakna, mbalulah ndeharana.

¹⁰Anak-anakna pe jadi pemindo-mindo si la lit rumahna, ipelawes i bas rumahna si enggo runtuh nari.

¹¹Irampas peridonnalah kerina erta-ertana, janah kalak si deban ngerampasi ulih dahinna.

¹²Ola min lit kalak si erkuah ate man bana, bage pe nandangi anak melumang si itadingkenna.

¹³Matelah min kerina kesusurenna, gelah gelarna lanai iinget kesusuren si arah pudi.

¹⁴Inget TUHANlah min lalap kejahaten nini-ninina, dosa-dosa nandena asa ndigan pe la ialemi.

¹⁵Inget TUHANlah min lalap dosa-dosana, tapi ia jine enggo ilupaken.

¹⁶Sabap kalak si bage la pernah ingetna encidahken kekelengen, itindasna kalak medanggel dingen musil; ibunuhna kalak si la ergegeh.

¹⁷Erkiteken ngena atena sumpah-sumpah ia jine kena sumpah. Erkiteken labo ia nggit masu-masu, ola min lit sekalak pe si masu-masu ia.

¹⁸Numpahi kalak biasa saja nge akapna, bali akapna ras make uisna. Mersaplah sumpahna e kubas badanna bagi lau, dingen ku bas tulan-tulanna bagi minak.

¹⁹Desken pencabini uis, bage ia icabini sumpahna e, dingen ngiket ia bagi gendit si ipakena tep-tep wari.

²⁰O TUHAN, dabuhken min ukumen si bage man musuhku, ku babo kalak si ngerana jahat kerna aku!

²¹Tapi sue ras padanNdu sampati min aku, o TUHAN Dibatangku, pulahi aku rikutken kiniulin dingen keleng ateNdu.

²²Sabap aku kalak mesera dingen musil, pusuhku mesui.

²³Menam aku bene desken awih-awih tupung berngi, aku ikisamken bagi labang.

²⁴Nggirgir takal tiwenku perban puasa aku, ringut dagingku tading tulan lanai erjukut.

²⁵Kasa kalak si ngidah aku tawa ia, janahna ngupir megombang ia man bangku. [167†]

²⁶O TUHAN Dibatangku sampati aku; erkiteken keleng ateNdu si tetap kelini min aku.

²⁷Bahan maka ieteh imbang-imbangku, maka Kam TUHAN me si ngkelini aku.

²⁸Isumpahina gia aku, tapi Kam si masu-masu aku, talukenlah imbang-imbangku, tapi aku suruh-suruhenNdu, bahanlah meriah ateku.

²⁹Tamburilah imbang-imbangku alu erbahanca ia mela, mela akapna encabini ia desken makeken uis.

³⁰Alu sora megang kukataken bujur man TUHAN; kupuji Ia i tengah-tengah jelma si nterem.

³¹Sabap ibelaNdu kalak si musil, ipulahiNdu ia i bas kalak si mereken ukumen mate man bana.