Read Batak Karo MASMUR 115 Bible Online

MASMUR 115 - Batak Karo bible

MASMUR 115

¹Man baNdu saja o TUHAN, labo man kami, man baNdu saja nge kemulian arus ibereken, erkiteken keleng ateNdu si tetap dingen kesetianNdu.

²Engkai maka bangsa-bangsa arus nungkun, “I ja kin Dibatandu?”

³I Surga kap Dibatanta, idahikenNa kai ateNa ibahanNa.

⁴Dibata-dibata kalak ah, ibahan i bas emas ras pirak nari, ibentuk alu tan manusia. [176†]

⁵Lit babahna, tapi la beluh ngerana, lit matana tapi la erpengidah.

⁶Lit cupingna, tapi la erpemegi, lit igungna tapi la erpenganggeh.

⁷Lit tanna, tapi la banci ndadap, lit nahena tapi la banci erdalan.

⁸Kerina kalak si enggo njadikenca dingen tek man gana-gana e, jadilah ia bali ras gana-gana e.

⁹O kalak Israel, teklah man TUHAN, Ia kap si nampati dingen si ngkawali kam.

¹⁰O imam-imam, teklah man TUHAN, Ia kap si nampati dingen si ngkawali kam.

¹¹O kerina si nembah man TUHAN, teklah man TUHAN, Ia kap si nampati dingen si ngkawali kam.

¹² TUHAN si nginget kita dingen si masu-masu kita, Ia si masu-masu kalak Israel, bage pe kerina imam-imam Dibata.

¹³Kerina kalak si erkemalangen man baNa, ipasu-pasuNa, subuk si meherga ntah lang. [177†]

¹⁴ TUHANlah si mereken tuah man bandu, ertambah-tambahlah kesusurenndu.

¹⁵Ipasu-pasu TUHANlah kam, Ia kap si enggo njadiken doni ras langit.

¹⁶ TUHAN kap empuna Surga, doni iberekenNa man manusia.

¹⁷Kalak si enggo mate labo muji TUHAN, e me kalak si enggo nusur ku bas doni kematen.

¹⁸Tapi kita si nggeluh denga nge si ngataken bujur man baNa, genduari nari seh rasa lalap. Pujilah TUHAN!