Read Batak Karo MASMUR 116 Bible Online

MASMUR 116 - Batak Karo bible

MASMUR 116

¹Keleng ateku man TUHAN, sabap idengkehkenNa aku, ibegikenNa pertotonku.

²IbegikenNa aku tep-tep kali aku erlebuh man baNa.

³Bahaya kematen ngkeleweti aku, kuburen si mejin enggo ndeheri aku, mbiar dingen aru kal ateku.

⁴E maka ningku nderkuh man TUHAN, “Mindo kal aku baNdu, o TUHAN, pulahi min aku!”

⁵ TUHAN e perkuah dingen bujur kap, Dibatanta e perkeleng kap.

⁶Ikawali TUHAN kap kalak si la lit si nampatisa, tupung aku i bas kebiaren, TUHAN si mulahisa.

⁷O tendingku, tenenglah, sabap TUHAN tetap erbahan si mehuli man bandu.

⁸ TUHAN enggo mulahi aku i bas kematen nari, isapuiNa iluhku janah ikawaliNa perdalanku gelah ola guling.

⁹E maka banci aku erdalan i adep-adepen TUHAN, ngenanami kegeluhen i doni enda.

¹⁰Aminna pe ningku, “Enggo mesui kal ateku,” tapi tetap nge aku erkiniteken; [178†]

¹¹Aminna pe aku i bas kebiaren janah ningku, “Ise pe labo terteki.”

¹²Kai banci kuulihken man TUHAN, kerna kerina kiniulinNa man bangku?

¹³Kupersembahken lau anggur man TUHAN, kukataken bujur man baNa, erkiteken pengkeliniNa aku, kusingetken me gelarNa.

¹⁴I bas perpulungen kerina bangsaNa, kupersembahken me kai si enggo kupadanken baNa.

¹⁵Meherga man TUHAN, adi sekalak bangsaNa mate.

¹⁶Suruh-suruhenNdu kap aku TUHAN, bali ras nandengku, aku pe erdahin guna Kam. Enggo aku ipulahiNdu idur kematen nari.

¹⁷Kubaba ateku baNdu persembahen pengataken bujurku, janahku ertoto man baNdu.

¹⁸ [18-19] I bas perpulungen kerina bangsaNdu, i bas RumahNdu si Badia i Jerusalem, kuendesken baNdu kai si enggo kupadanken. Pujilah TUHAN!