Read Batak Karo MASMUR 118 Bible Online

MASMUR 118 - Batak Karo bible

MASMUR 118

¹Kataken bujur man TUHAN erkiteken kiniulinNa, kekelengenNa tetap rasa lalap. [180†]

²Ninalah kalak Israel, “KekelengenNa tetap rasa lalap.”

³Ninalah imam-imam Dibata, “KekelengenNa tetap rasa lalap.”

⁴Ninalah si nembah man TUHAN, “KekelengenNa tetap rasa lalap.”

⁵I bas kesusahenku erlebuh aku man TUHAN, e maka idengkehkenNa dingen ipulahiNa aku.

⁶ TUHAN kap ras aku, e maka la mbiar aku pe, kai kin banci ibahan kalak man bangku? [181†]

⁷ TUHAN kap penampatku, e maka kuidah imbang-imbangku italuken.

⁸Madin ernalem man TUHAN, asangken ernalem man manusia.

⁹Madin ernalem man TUHAN, asangken ernalem man kalak si erkuasa.

¹⁰Nterem bangsa-bangsa sekelewetku, tapi alu gegeh TUHAN, kukernepken ia kerina.

¹¹Ikepungna aku, tapi alu gegeh TUHAN, kukernepken ia kerina.

¹²Iulung-ulungna aku bagi pengulung-ulung wani, tapi nimpet ia desken permeseng rih, alu gegeh TUHAN kukernepken ia kerina.

¹³Alu mesangat iserangna aku, janah menam talu, tapi TUHAN si nampati aku.

¹⁴ TUHAN erbanca aku megegeh dingen paguh, Ia si enggo mulahi aku. [182†]

¹⁵Begiken sora surak kemenangen i bas kemah bangsa Dibata nari: “Kuasa TUHAN ergegeh i bas peperangen!

¹⁶Kuasa TUHAN erbahanca kita menang, kuasa TUHAN ergegeh i bas peperangen.”

¹⁷La aku mate tapi nggeluh, jenari kumomoken kai si enggo ilakoken TUHAN.

¹⁸Tuhu mberat aku iukum TUHAN, tapi la ipelepasNa mate.

¹⁹Pulka man bangku pintu gerbang Rumah Pertoton, maka aku bengket janah ngataken bujur man TUHAN.

²⁰Enda me pintu gerbang TUHAN, kalak bujur ngenca banci bengket ku bas.

²¹Kupuji Kam TUHAN, erkiteken idengkehkenNdu pertotonku, enggo iberekenNdu kemenangen man bangku.

²²Batu si iambekken tukang, e me jadi batu palas si la banci lang. [183†] [184†]

²³E me peraten TUHAN, tuhu mekelek rejin siakap ngidahsa.

²⁴Enda me wari kemenangen TUHAN, marilah si rayaken alu meriah ukur.

²⁵Kelini kami TUHAN, kelini kami, bereken kemenangen man kami. [185†]

²⁶Ketuahen kalak reh i bas gelar TUHAN i bas Rumah Pertoton nari ipasu-pasu kami kam. [186†]

²⁷ TUHAN kap Dibata; gelgel nari mehuli perbahanenNa man banta alu encikep dahan-dahan, mulailah erpesta, jenari keleweti batar-batar ingan persembahen.

²⁸Kam kap Dibatangku, e maka kukataken bujur baNdu, kumomoken kemulianNdu.

²⁹Katakenlah bujur man TUHAN sabap mehuli kal kap Ia, kekelengenNa tetap rasa lalap.