Read Batak Karo MASMUR 132 Bible Online

MASMUR 132 - Batak Karo bible

MASMUR 132

¹O TUHAN, inget min kempak Daud, dingen kerina kiniseranna.

²Ingetlah o TUHAN kai si ipadankenna, sumpah si ibelaskenna man baNdu, o Dibata si Mbisa nu Jakup,

³nina, “La aku mulih ku rumah, ntah medem i bas ingan medemku,

⁴la kupediat matangku tertunduh, la kupediat seliben matangku terpit-pit,

⁵ope denga kusikapken sada Rumah man TUHAN, sada ingan man Dibata si Mbisa nu Jakup.”

⁶O Betlehem si ndengkehken kerna Peti Perpadanen, jenari jumpai i mbalmbal Jearim.

⁷E maka ninta, “Ota kita ku Rumah TUHAN, nembah i adep-adepen kursi kinirajanNa.”

⁸Rehlah Kam ku inganNdu tading o TUHAN, radu ras Peti Perpadanen tanda kuasaNdu. [188†]

⁹Ersurak-suraklah bangsaNdu, kerina imam-imamNdu lalaplah erbahan si ngena ateNdu.

¹⁰Enggo Kam erbahan perpadanen ras suruh-suruhenNdu Daud, ola tulak raja pilihenNdu o TUHAN.

¹¹Alu sumpah erpadan Kam ras Daud, sumpah si lanai banci iobah, “Sekalak i bas anakndu si dilaki Kujadiken raja, janah ia pagi si kundul i bas kursi kinirajanndu. [189†]

¹²Adi kerina anakndu encikep perpadanKu, dingen ngikutken perentah-perentah si Kuajarken, e maka kesusurenna pe rasa lalap nggancihi kam jadi raja.”

¹³ TUHAN enggo milih Sion, ibahanNa ateNa e man inganNa.

¹⁴Nina, “I jenda me Aku tading rasa lalap, i jenda nari Aku jadi raja.

¹⁵Kai si iperluken Sion, Kubereken alu simpar, kalak si musilna Kubesuri alu pangan.

¹⁶Imam-imam Kupasu-pasu i bas kerina pendahinna, dingen rayatna rende janah ersurak-surak meriah.

¹⁷I jenda Kujadiken sekalak raja mbelin i bas kesusuren Daud nari, Aku erbahanca maka kinirajan raja pilihenKu tetap nteguh. [190†]

¹⁸Kerajanna paguh, dingen ermulia tapi imbang-imbangna mela akapna Kubahan.”