Read Batak Karo MASMUR 136 Bible Online

MASMUR 136 - Batak Karo bible

MASMUR 136

¹Kataken bujur man TUHAN, sabap mehuli kal Ia, keleng ateNa tetap rasa lalap. [192†]

²Kataken bujur man Dibata nu dibata-dibata; keleng ateNa tetap rasa lalap.

³Kataken bujur man TUHAN kerina tuan-tuan; keleng ateNa tetap rasa lalap.

⁴Ia ngenca si erbahan tanda-tanda kuasa; keleng ateNa rasa lalap.

⁵Alu kepentarenNa ijadikenNa langit, keleng ateNa tetap rasa lalap. [193†]

⁶IpantekiNa doni i babo lau, keleng ateNa tetap rasa lalap.

⁷Sierbahan matawari ras bulan, keleng ateNa tetap rasa lalap. [194†]

⁸Matawari ngkuasai suari, keleng ateNa tetap rasa lalap.

⁹Bulan ras bintang ngkuasai berngi, keleng ateNa tetap rasa lalap.

¹⁰IbunuhNa kerina anak sintua i Mesir, keleng ateNa tetap rasa lalap. [195†]

¹¹ItaruhkenNa Israel ndarat i tengah-tengah bangsa Mesir nari; keleng ateNa tetap rasa lalap. [196†]

¹²Alu tanNa si megegeh ras tentera si megegeh, keleng ateNa tetap rasa lalap.

¹³Lawit Merah ibelah duakenNa; keleng ateNa tetap rasa lalap. [197†]

¹⁴IbahanNa bangsaNa ngepari lawit e; keleng ateNa tetap rasa lalap.

¹⁵Tapi raja Mesir ras tenterana igedapkenNa; keleng ateNa tetap rasa lalap.

¹⁶IbabaiNa bangsaNa arah gurun pasir, keleng ateNa tetap rasa lalap.

¹⁷Raja-raja si mbisa talu ibahanNa, keleng ateNa tetap rasa lalap.

¹⁸Raja-raja si terberita ibunuhNa; keleng ateNa tetap rasa lalap.

¹⁹Sihon raja Amori; keleng ateNa tetap rasa lalap. [198†]

²⁰Og raja Basan; keleng ateNa tetap rasa lalap. [199†]

²¹Negeri e iberekenNa man bangsaNa, keleng ateNa tetap rasa lalap.

²²Jadi pusaka man Israel, suruh-suruhenNa; keleng ateNa tetap rasa lalap.

²³Tupung kita italuken la Ia lupa man banta; keleng ateNa tetap rasa lalap.

²⁴ItangtangiNa kita i bas tan musuh nari; keleng ateNa tetap rasa lalap.

²⁵Kerina mahluk-mahluk si nggeluh ibereNa man; keleng ateNa tetap rasa lalap.

²⁶Kataken bujur man Dibata raja Surga; keleng ateNa tetap rasa lalap.