Read Batak Karo MASMUR 140 Bible Online

MASMUR 140 - Batak Karo bible

MASMUR 140

²O TUHAN, pulahi min aku i bas kalak jahat nari, kelini min aku idur kalak si la lit i bassa perkuah ate.

³Katawari pe si jahat irencanakenna lalap atena peturah perubaten.

⁴Dilahna desken nipe si erbisa, rananna bali ras bisa nipe upar. [201†]

⁵O TUHAN, kawali min aku i bas kuasa kalak si des ate, jagai min aku i bas kalak si jahat nari, si atena ncilakaken aku.

⁶Kalak megombang erbuni-buni nidingi aku, itogengna banto guna nangkap aku. Gedang-gedang dalan itogengina siding, guna nidingi aku.

⁷Kukataken man TUHAN, “Kam kap Dibatangku.” Dengkehkenlah pertotonku mindo penampat, o TUHAN.

⁸O TUHAN Dibatangku, Kam kap penampatku si megegeh, enggo ikawaliNdu aku i bas perang.

⁹O TUHAN, ola bereken seh sura-sura kalak jahat, ola bahan seh sura-surana.

¹⁰Ola bere kemenangen man imbang-imbangku, sumpahna man bangku ndabuhlah man bana mulihken.

¹¹Bahanlah maka rara api ndabuh ku ia, jenari iambekken ia ku bas lubang si mbages gelah lanai banci ndarat.

¹²Kalak si mahan-mahani salah kalak, ola pediat ringan i bas negeri enda, kutundukken kalak jahat alu cilaka, janah benelah ia.

¹³O TUHAN, kueteh maka Kam kap pembela kalak si musil-musil, janah kalak si itindas ibelaNdu.

¹⁴Kalak benar ipujina Kam, nggeluh ia i bas adep-adepenNdu.