Read Batak Karo MASMUR 141 Bible Online

MASMUR 141 - Batak Karo bible

MASMUR 141

¹Masmur Daud. O TUHAN, erlebuh aku man baNdu, sampati min aku genduari! Dengkehken min aku, tupung aku erlebuh man baNdu.

²Alokenlah pertotonku desken persembahen si merim, tanku si kudadaken desken persembahen karaben. [202†]

³O TUHAN, jagai min babahku, eruk min biberku.

⁴Ola min pediatNdu jahat sura-surangku, ntah pe ngikut ken perbahanen kalak jahat. Ndigan pe, ola min aku ikut i bas kerja-kerjana man-man.

⁵Adi kalak bujur mandang dingen ngukum aku, tama kiniulin kap e man bangku. Tapi pujin i bas kalak jahat nari la kualoken, sabap aku usur ertoto ngelawan perbahanenna si jahat.

⁶Kune peminpin-peminpinna ianjemken i bas tebing batu nari, e maka tek me kalak e maka tuhu nge si kukataken.

⁷Desken kayu si taka dingen iripukken, bage me pe tulan-tulanna ikerapken i tepi kuburen.

⁸Tapi aku tetap ernalem man baNdu, o TUHAN Dibatangku, ku Kam nge aku cicio, ola aku pelepasNdu mate.

⁹Kawali aku maka ola aku kena siding si itogengna lako nangkap aku, kawali aku i bas ragum kalak jahat e nari.

¹⁰Bahan maka kalak jahat kena sidingna jine, tapi aku mentas la kena kai pe.