Read Batak Karo MASMUR 142 Bible Online

MASMUR 142 - Batak Karo bible

MASMUR 142

¹Ende-enden Daud tupung ia i bas gua; pertoton. [203†]

²Erlebuh aku man TUHAN, man baNa aku mindo penampat.

³Man baNa kutungkasken kerina ukurku picet, kuturiken man baNa kerina kesusahenku.

⁴Tupung tumpat ukurku, ietehNa kai si arus kubahan. I bas dalan si ateku kudalani, enggo itogeng imbangku siding lako nidingi aku.

⁵Tupung kutulihken ku sekelewetku, la lit si banci nampati. La lit ise pe si ngkawali aku, ise pe la lit si mperdiateken aku.

⁶O TUHAN, nderkuh aku mindo penampat, Kam TUHAN, Kam kap man inganku cicio. Kam ngenca sura-surangku i bas kegeluhen enda.

⁷Dengkehken min penderkuhku mindo penampat, enggo gedap aku i bas ukurku gulut. Pulahi min aku i bas imbang-imbangku nari, megegehsa ia rimbangken aku.

⁸Tangtangi aku i bas kesusahenku nari, maka tupung bangsaNdu pulung, aku pe banci muji Kam, erkiteken kiniulinNdu man bangKu.