Read Batak Karo MASMUR 143 Bible Online

MASMUR 143 - Batak Karo bible

MASMUR 143

¹Masmur Daud. O TUHAN, dengkehken min pertotonku, perdiateken min pemindonku. Erkiteken kinibujuren ras pertetapNdu, aloi min aku.

²Aku suruh-suruhenNdu kap, ola min aku erpekara ras Kam sabap la lit kalak si la ersalah i adep-adepenNdu. [204†]

³Musuhku ngelis-ngelis aku, jenari idampeskenna aku ku taneh. Itamakenna aku ku bas tutupen si gelap, e maka enggo seri aku ras kalak si enggo ndekah mate.

⁴Enggo labuh kal aku, bene kal ukurku.

⁵Kupeinget-inget wari-wari si enggo lepas, kuukuri kerina perbahanenNdu, kukusur-kusur i bas pusuhku kai si enggo ilakokenNdu.

⁶Kuangkat tanku ertoto aku man baNdu, desken taneh kelegon, muas aku man baNdu.

⁷O TUHAN, genduari aloi min aku, enggo bene pengarapenku. Ola ibunikenNdu baNdu man bangku, maka ola aku bali ras kalak si perlawesna kempak doni kematen.

⁸Persingeti bangku tep-tep erpagi-pagi kerna keleng ateNdu si tetap, man baNdu saja ngenca aku ernalem. Pertotonku kupenangkih man baNdu, tuduhken man bangku dalan si man dalinenku.

⁹Kam me inganku cicio, o TUHAN, pulahi min aku i bas imbang-imbangku nari.

¹⁰Kam kap Dibatangku, ajari aku ngelakoken peratenNdu. Mehuli min Kam kempak aku, jenari babai aku arah dalan si pinter.

¹¹Pegeluh min aku o TUHAN erkiteken gelarNdu, erkiteken kiniulinNdu tangtangi min aku i bas kesusahen nari.

¹²Erkiteken keleng ateNdu man bangku, bunuhlah kerina imbang-imbangku. Erkiteken aku suruh-suruhenNdu, kernepken min kerina musuh-musuhku.