Read Batak Karo MASMUR 144 Bible Online

MASMUR 144 - Batak Karo bible

MASMUR 144

¹Masmur Daud. Pujilah TUHAN sekawalku, iajariNa aku lako erperang, dingen isikapkenNa aku ertempur.

²Ia kap pengawal dingen pembelangku, inganku cilinggem ras si engkelini aku. Ia me ampang-ampang inganku cicio, Ia si erbahanca bangsa-bangsa nembah mungkuk man bangku.

³O TUHAN, ise kin manusia maka ipergermetkenNdu ia? Ise kin ia maka iperdiatekenNdu ia? [205†]

⁴Pergeluh manusia e desken sekali erkumesah kap ngenca, desken awih si mentas saja.

⁵O TUHAN, caingken min langit jenari nusur min Kam, kuit min deleng-deleng maka reh gebukna.

⁶Kencerken min kilapNdu maka huntak imbangNdu kerina, pulahi min anak panahNdu gelah lanai ietehna perkiamna.

⁷Dadaken min tanNdu i Surga nari, pulahi min aku, angkat aku i bas lawit si mbages nari. Tangtangi aku i bas kuasa bangsa si deban nari,

⁸si la enggo pernah ngataken si tuhu dingen nggit melasken sumpah palsu.

⁹O Dibata kuendesken ateku ende-enden si mbaru, aku ngkuit kulcapi dingen rende man baNdu.

¹⁰IberekenNdu kemenangen man raja-raja, suruh-suruhenNdu Daud ipulahiNdu.

¹¹Kelini min aku i bas musuh si kejam nari, pulahi min aku i bas kuasa bangsa si deban nari, si langa pernah ngataken tuhu, dingen nggit melasken sumpah palsu.

¹²Anak-anak kami tupung anak perana, balilah min desken batang kayu si turah alu megegeh. Janah anak-anak kami si diberu tupung singuda-nguda, jadilah desken tiang si ihias i bas suki-suki istana.

¹³Bahanlah gudang-gudang kami dem isina, alu ulih juma si melala erbagena. Bahanlah min biri-biri kami i mbalmbal, meribu-ribu buena.

¹⁴Jadilah maka merih lembu kami, dingen la lit si bene dingen la lit si keguguren. Ola min lit kalak si kelsehen, i bas dalin-dalin kuta kami.

¹⁵Malem ate bangsa-bangsa si bage, malem ate kalak si erDibataken TUHAN.