Read Batak Karo MASMUR 145 Bible Online

MASMUR 145 - Batak Karo bible

MASMUR 145

¹Ende-enden pengataken bujur Daud. O Dibatangku, o Rajangku, kuberitaken ateku kerna kemulianNdu si mbelin asa lalap seh rasa lalap ateku ngataken bujur man baNdu.

²Tep-tep wari kukataken bujur man baNdu, dingen rasa lalap ateku Kam kupuji.

³ TUHAN kap si Meganjangna, e maka arus man baNa pujin si Meganjangna; la kap terukuri uga belinna kemulianNdu.

⁴Kai si enggo ibahanNdu la banci lang terpuji i bas kerina kesusuren si arah pudi. PerbahanenNdu si mbelin la banci lang iberitakenna.

⁵Ngerana ia kerna kiniulin ras kemulianNdu, janah perbahanenNdu si mejin kukusur-kusur i bas pusuhku.

⁶La banci lang ngerana kalak kerna perbahanenNdu si mbelin, janah ermomo ateku kerna kemulianNdu.

⁷Iturikenna kerina kerna belinna kiniulinNdu, janah rende kerna kinibujurenNdu.

⁸ TUHAN perkeleng dingen perkuah kap, la pedas Ia merawa, janah dem keleng ate si tetap.

⁹Man ise pe mehuli Ia, janah keleng ateNa man kerina tinepaNa.

¹⁰O TUHAN, kerina tinepaNdu muji Kam, kerina bangsaNdu ngataken bujur me.

¹¹Ngerana ia kerna kemulian kinirajanNdu, janah kinimbisanNdu iturikenNa.

¹²Alu bage, kerina kalak meteh kerna perbahanenNdu si mbelin, dingen kemulian kinirajanNdu si erdolat.

¹³KinirajanNdu tetap rasa lalap, janah Kam me raja si rasa lalap. TUHAN tetap i bas kerina padanNa, janah kai si ibahanNa mehuli kal kerina.

¹⁴Kalak si mesera isampatiNa, kalak si guling iteguNa.

¹⁵Kerina si nggeluh ernalem man baNdu saja. I bas paksana, iberekenNdu panganna si cukup.

¹⁶IdadakenNdu tanNdu iperiahkenNdu pusuh kerina si nggeluh.

¹⁷Bujur kap kerina perbahanen TUHAN, i bas kerina si ibahanNa Ia dem perkuah ate.

¹⁸Man si erlebuh man baNa ndeher kap Ia, si erlebuh man baNa alu tutus ate.

¹⁹IberekenNa keperlun kalak si erkemalangen man baNa, idengkehkenNa penderkuhna, jenari ikeliniNa ia.

²⁰Asa kalak si erkeleng ate man TUHAN ikawaliNa, tapi kalak jahat ikernepkenNa.

²¹Rasa lalap ateku muji TUHAN, o kerina tinepaNa, pujilah gelarNa si Badia seh rasa lalap.