Read Batak Karo MASMUR 147 Bible Online

MASMUR 147 - Batak Karo bible

MASMUR 147

¹Pujilah TUHAN! Andiko ulina rende muji Dibata; andiko senangna ras bujurna muji Ia.

²Jerusalem ipanteki TUHAN kap mulihi, kalak buangen ibabaNa ka mulih.

³IpepalemNa kalak si getem pusuhna, dingen ibalutiNa ugahna.

⁴Ia si nentuken beligan bintang-bintang i langit, dingen ibahanNa gelarna sada-sadai.

⁵Mbelin dingen mbisa kal kap Tuhanta, kepentarenNa pe la tersipati.

⁶Kalak si meteruk ipeganjangNa, tapi kalak jahat idampeskenNa.

⁷Endekenlah ende-enden pujin man TUHAN, rendelah muji TUHAN alu kulcapi.

⁸Ia kap si engkimbangken embun i langit, si mereken udan ku doni, si peturah dukut i uruk-uruk.

⁹Ia kap si mere nakan man rubia-rubia, si mere nakan man perik kak si ciap-ciap ku Ia.

¹⁰ TUHAN la ngena ateNa kuda si megegeh, la diateNa tentera-tentera si mbisa.

¹¹Tapi ngena ateNa man kalak si erkemalangen man baNa, si ernalem man keleng ateNa si tetap.

¹²Pujilah TUHAN, o Jerusalem! Pujilah Dibatandu, o Sion!

¹³Ia si erbahanca pintu gerbangndu tetap nteguh. Ia si masu-masu kalak si ringan i bas kam.

¹⁴Ia si njagai perbalengen daerahndu maka dame, si mereken kesenangen man bandu alu gandum si mejilena.

¹⁵Ia si mereken perentah man doni, kai si ikatakenNa minter jadi.

¹⁶IkimbangkenNa salju desken kapas, ikencerkenNa embun desken abu.

¹⁷IdabuhkenNa baho desken batu rintik, kerina kalak nggirgir perbahan bergehna.

¹⁸BekasNa ersuruh e maka es melengas, iembuskenNa angin e maka lau jadi maler.

¹⁹IpesehNa kataNa man bangsana, perentah-perentahNa ras undang-undangNa man Israel.

²⁰Perbahanen si bage la ibahanNa man bangsa-bangsa si deban, bangsa-bangsa e la meteh undang-undangNa. Pujilah TUHAN!