Read Batak Karo MASMUR 17 Bible Online

MASMUR 17 - Batak Karo bible

MASMUR 17

¹Pertoton Daud. O TUHAN, dengkehkenlah pemindonku kerna kinibujuren, perdiatekenlah pertotonku mindo penampat! Begikenlah pertotonku, i bas biberku nari si la lit i je penipu.

²Kam me si ngerunggui kinibujurenku, sabap Kam si meteh bujur.

³Ietehndu isi pusuhku. Tupung berngi ipepayoNdu aku, arah dampar si apai pe enggo aku iujiNdu, janah la lit idahNdu sura-sura si jahat i bas aku.

⁴Aku labo jahat bagi kalak si deban; patuh aku man perentahNdu, dingen la kuikutken dalan kalak jahat.

⁵Tetap aku erdalan arah dalanNdu, dingen la pernah nilah i jenari.

⁶O Dibata, ertoto aku man baNdu sabap idengkehkenNdu aku; dage mulihlah Kam man bangku dengkehkenlah rananku.

⁷Cidahken keleng ateNdu si mbelin, janah kelini kami; i bas adep-adepenNdu terkawal kap kami.

⁸Kawali aku bagi ngkawali anak mata, buniken aku i teruh kabengNdu.

⁹gelah ola aku iupuh kalak jahat. Gelah ola ibuatna kesahku.

¹⁰La lit keleng ate i bas ia; rananna pe megombang.

¹¹Genduari kuja pe aku, ikerubuina sura-surana ndampesken aku ku taneh.

¹²Bagi singa nggempangi panganna, irigepna atena aku gelah getem icaing-caingna.

¹³O TUHAN, mari min! Lawan dingen taluken musuh-musuhku, pulahi aku i bas kalak jahat nari alu pedangNdu.

¹⁴Pulahi min aku, i bas kalak si pepulung ertana i doni enda. Ukum min ia kerina alu cilaka, si enggo isikapkenNdu guna ngukumsa. Kempu-kempuna pe, ola pulah i bas ukumenNdu nari.

¹⁵Tapi adi aku kutare me ayoNdu, erkiteken la lit kesalahen si kulakoken. Janah tupung aku medak, malem ateku ngidah siang ayoNdu.