Read Batak Karo MASMUR 18 Bible Online

MASMUR 18 - Batak Karo bible

MASMUR 18

¹Kata-kata Daud persuruhen Dibata, si iendekenna man TUHAN tupung TUHAN engkelini ia i bas Saul ras musuh-musuh si deban nari.

²Lanai tanggung keleng ateku man baNdu TUHAN, Kam kap sumbul geluhku.

³ TUHAN kap pengawalku, Ia kap bentengku si nteguh, Dibatangku kap si engkelini aku e maka i bas Ia, teneng kap aku. Ia desken ampang-ampang perang si engkawali aku, ijagaNa aku, gelah tetap teneng aku.

⁴Erlebuh aku kempak TUHAN, jenari ikeliniNa aku i bas musuh-musuhku nari. Pujilah TUHAN!

⁵Tinali kalak mate ngelileti aku. Galumbang kebenen nggedapken aku.

⁶Tinali doni kematen enggo ngelilet aku, kuburen nganga bagi siding i adepenku.

⁷I bas kesusahen erlebuh aku man TUHAN, mindo penampat kulebuh Dibatangku. I bas kemah si Badia nari ibegikenNa sorangku, perserkongku seh kempak Dibatangku.

⁸E maka mugur-ugur dingen nggirgir doni enda; palas deleng-deleng kumeter mundu-undu erkiteken rawa Dibata.

⁹Asap erdipul arah lubang igungNa, api ras rara ndaraten arah babahNa.

¹⁰IcaingkenNa langit, jenari nusur Ia, embun mbiring lit i teruh naheNa.

¹¹Kabang Ia ngersak mahluk erkabeng; i datas kabeng angin erdalan Ia.

¹²Itamburina baNa alu kegelapen, embun mekapal dem udan meder engkeleweti Ia.

¹³Baho ras rara api ndarat iher kilap i adep-adepenNa nari, itembusna embun si gelap e.

¹⁴Kenca bage erlenggur TUHAN i langit nari; terbegi sora Dibata si Meganjangna.

¹⁵IpanahkenNa panahna marpar imbang-imbangNa, tupung reh perkas ngerbul ia kerina.

¹⁶Kelbung lawit talang, palas doni lanai ketamburen, tupung isergangNdu o TUHAN imbangNdu alu rawaNdu.

¹⁷Idadaken TUHAN tanNa bangku i datas nari, i bas lau si mbages nari irintakNa aku ku das.

¹⁸IpulahiNa aku i bas musuhku si megegeh nari, i bas kerina kalak si ernembeh ate man bangku. Ndauh ia gegehen asangken aku.

¹⁹Tupung aku i bas kiniseran iserang musuh aku, tapi ikawali TUHAN aku.

²⁰IsampatiNa aku maka pulah i bas bahaya nari, ikeliniNa aku erkiteken keleng ateNa.

²¹ TUHAN mereken upah si mehuli bangku, sabap kulakoken si bujur, ipasu-pasuNa aku erkiteken la kubahan salah.

²²Enggo kuikutken Undang-undang TUHAN Dibatangku la pernah kutundalken.

²³Kerina Undang-undangNa kuperdiateken, kerina perentahNa la kusilahken.

²⁴IetehNa maka la aku erdalan arah si lepak dingen kujaga diringku gelah la erbahan salah.

²⁵Perbahan kulakoken si bujur, iberekenNa upah si mehuli man bangku ietehNa maka la lit kubahan kesalahen.

²⁶O TUHAN, Kam bujur kempak kalak si tutus man baNdu, kiniulinNdu serta man kalak si serta.

²⁷Kempak kalak si badia, badia perbahanenNdu, tapi kalak jahat imusuhiNdu.

²⁸IkeliniNdu si meteruk ukur, tapi ipeterukNdu kalak megombang.

²⁹O TUHAN iberekenNdu bangku sinalsalNdu, ilesapkenNdu kegelapenku.

³⁰Kam mereken gegeh man bangku naluken musuh-musuhku. Kam mere kuasa bangku ngkuasai benteng-bentengna.

³¹Perbahanen Dibata serta, padan TUHAN terarapken kap. Ia desken ampang-ampang perang, man kalak si ernalem man baNa.

³²Sabap la lit Dibata seakatan TUHAN, Dibata ngenca benteng kami.

³³Ia me Dibata si erbahanca aku megegeh, si erbahanca maka i bas dalanku la lit kebiaren.

³⁴Ipegegehina nahengku bagi nahe belkih, ipedauhna kebiarenku i das deleng-deleng. [19†]

³⁵IberekenNa bangku pelajaren perang, e maka panah si megegehna pe banci kupake.

³⁶O TUHAN perbahan ikawaliNdu aku, maka terkelin aku; sabap kuasaNdu, maka aku jadi kalak si mehamat.

³⁷IjagaNdu aku maka la tertaban, ikawaliNdu maka la aku guling.

³⁸Kuelis imbang-imbangku dingen talu kubahan, adi langa ia kernep kerina langa kungadiken.

³⁹Kudampesken ia kerina keke pe lanai banci, ampar ia i teruh nahengku.

⁴⁰IberekenNdu bangku gegeh erperang, iberekenNdu aku naluken imbang-imbangku seh menang.

⁴¹IbahanNdu maka kiam musuh i adep-adepenku nari, kalak si ernembeh ate bangku kukernepken kerina.

⁴²Serko ia mindo penampat, tapi la lit si nampati, erlebuh ia man TUHAN tapi la ialoiNa.

⁴³Kututu ia maka bali ras abu iembus angin, kudedehi ia maka bali ras kubang i duru dalan.

⁴⁴IpulahiNdu aku i bas bangsa-bangsa si perubat-rubat nari, ijadikenNdu aku jadi raja man bangsa-bangsa, bangsa si la kin pernah kutandai jadi rayatku.

⁴⁵Bangsa si deban nembah i adep-adepenku, tupung ibegina gelarku mintes ia patuh.

⁴⁶Enggo bene ukurna, alu nggirgir ndarat ia i bas bentengna nari.

⁴⁷ TUHAN nggeluh kap! Pujilah Penampatku! Beritakenlah kemulian Dibata si nelamatken aku.

⁴⁸IberekenNa bangku kemenangen naluken musuh-musuhku, italukenNa bangsa-bangsa i teruh kuasangku.

⁴⁹Aku ikelini TUHAN i bas musuh ras kalak jahat nari, dingen iberekenna kemenangen naluken imbangku.

⁵⁰E maka kupuji TUHAN i tengah bangsa-bangsa, kuendeken ende-enden pujin man baNa. [20†]

⁵¹Dibata mereken kemenangen si mbelin man rajaNa, tetap Ia erkeleng ate man raja pilihenNa, e me Daud ras kesusurenna, seh ku si ndekah-ndekahna.