Read Batak Karo MASMUR 20 Bible Online

MASMUR 20 - Batak Karo bible

MASMUR 20

²Dibatalah si mperdiateken kam tupung i bas kiniseran! Dibata nu Jakuplah si ngkawali kam!

³IsampatiNalah kam i bas RumahNa si badia nari, iberekenNalah penampat i Deleng Sion nari.

⁴IalokenNalah kerina persembahenndu, dingen merim iakapNa persembahen tutungenndu.

⁵IsehkenNalah kerina sura-surandu, dingen sangap kam i bas si irencanakenndu.

⁶Gelah ersurak kami perbahan riahna, dingen erbahan kerja meriah kerna kemenangenndu, alu rende muji Dibata. Iperdiateken Dibatalah kerina pemindonndu.

⁷Genduari kueteh maka TUHAN si mereken kemenangen man raja pilihenNa, i Surga nari TUHAN ngaloi ia; alu kuasa TUHAN iberekenNa man raja kemenangen si mbelin.

⁸Lit kalak si ernalemken gereta perangna, lit ka si ernalem man kudana. Tapi kita la bage; kita ernalem man gegeh TUHAN Dibata.

⁹Kalak si ernalem man gereta perang ras kudana, la banci la terantuk dingen guling. Tapi kita si ernalem man TUHAN, kekelah dingen tedis paguh.

¹⁰O TUHAN, bereken kemenangen man raja, tupung kami erlebuh, begikenlah.