Read Batak Karo MASMUR 22 Bible Online

MASMUR 22 - Batak Karo bible

MASMUR 22

²Dibatangku, o Dibatangku, ngkai maka aku itadingkenNdu? Serko aku mindo penampatNdu, tapi lalap Kam la reh. [22†]

³O Dibatangku, kulebuh Kam tupung siang denga, tapi Kam sinik saja. Erlebuh aku sanga berngi, ukurku lalap la teneng.

⁴Tapi Kam Raja si Badia, man baNdu Israel ngendeken ende-enden.

⁵Nini-nini kami ernalem man baNdu, perbahan ernalem ia man banNdu, ia ikeliniNdu.

⁶Erlebuh ia man baNdu e maka ia ipulahi. Ernalem ia man baNdu janah la ia juru.

⁷Aku labo manusia tapi bernga, si igombangi dingen iuru-uru kalak.

⁸Kerina si ngidah aku megombang, ercidur dingen ngupir ia. [23†]

⁹Nina, “TUHAN kap penalemenndu, ngkai maka Ia la reh ngkelini? Adi ngena ate TUHAN bandu ngkai maka la Ia reh nampati?” [24†]

¹⁰Kam pedarat aku i bas nandengku nari, ijagaNdu aku tupung kitik-kitikku gelah aku terkawal.

¹¹Mena kin tubuh, geluhku lit i bas tanNdu, mulai kin i bas bertin nandengku, Kam kap Dibatangku.

¹²Enggo ndeher kiniseran, ola min Kam tetap ndauh O TUHAN, sabap adi la Kam, ise kin nampati aku?

¹³Bali ras rarasen banteng, ikeleweti musuh aku, bagi banteng si meliar i Basan nari, ikepungna aku.

¹⁴Nganga babahna ngalaken aku, bagi singa erdengum ngerigep panganna atena.

¹⁵Kerina gegehku enggo keri, bali ras lau mambur ku taneh, tulan-tulanku enggo nangtangen kerina, pusuhku melengas bagi lilin kena api.

¹⁶Kalah-kalahku kerah bali ras abu, dilahku leket i das langit-langit babahku. I bas abu kematen, iamparkenNdu aku. [25†]

¹⁷Gerombolen kalak jahat ngepung aku; bagi rarasen biang ideherina aku, itebakna tanku ras nahengku.

¹⁸Tulan-tulanku enggo teridah kerina, janah puas akap imbangku ngidahsa.

¹⁹Ibagi-bagina pakenku, jenari itikam tandukkenna baju lantangku. [26†]

²⁰Tapi ola min Kam ndauh, o TUHAN, minter min Kam reh nampati aku.

²¹Kelini aku i bas pedang nari, pulahi min aku i bas biang si ngerigep nari.

²²Aku lanai ergegeh, pulahi min aku i bas tanduk banteng ras i bas babah singa.

²³Kai si ibahanNdu kumomoken man bangsangku, i bas perpulungen kupuji gelarNdu. [27†]

²⁴Pujilah Ia, o kam suruh-suruhen TUHAN, o kam kesusuren Jakup muliakenlah Ia. Erjimpuhlah i adep-adepenNa o kam kesusuren Israel.

²⁵Sabap la ipersilahangNa kalak si tertindih, dingen tetap iperdiatekenNa kiniseranna. Ia labo erpenundal, tapi ialoiNa adi erlebuh man baNa.

²⁶Kupuji TUHAN i tengah-tengah perpulungen si mbelin kerna kerina si enggo ibahanNa. I adep-adepen perpulungen si erkemalangen man TUHAN, kupersembahken persembahen si enggo kupadanken baNa.

²⁷Kalak musil man asa besurna, kalak si ndarami TUHAN pujilah Ia. Senang iakapna seh rasa lalap.

²⁸Kerina bangsa ingetna TUHAN, i belang-belang doni enda nari reh kerina suku bangsa mulihken nembah man baNa.

²⁹Sabap TUHAN kap raja, Ia kap si merentah bangsa-bangsa kerina.

³⁰Kerina kalak si meganjang rukur erjimpuh i lebe-lebeNa, manusia si ermasap-masap erjimpuh i adep-adepenNa.

³¹Kesusuren si nandangi reh ersembah man TUHAN, ersundut-sundut Ia iberitaken.

³²Man si langa tubuh pe denggo ituriken, maka “TUHAN enggo ngkelini bangsaNa”.