Read Batak Karo MASMUR 25 Bible Online

MASMUR 25 - Batak Karo bible

MASMUR 25

¹I bas Daud nari. Man baNdu o TUHAN ertoto aku,

²man baNdu ernalem aku o Dibatangku. Ola pelepas mela kuakap, ola pediat imbang-imbangku tawa-tawa kerna aku.

³Kalak si ngarap man baNdu la mela akapna, tapi kalak si nadingken Kam la ersabap juru me iakapna.

⁴Ajari aku o TUHAN kerna peratenNdu, petangkas kai si arus kulakoken.

⁵Ajari aku o TUHAN erdalan arah kebenarenNdu, sabap Kam kap Dibatangku. Kam kap si ngkelini aku, man baNdu aku lalap ernalem.

⁶Ingetlah o TUHAN perkuah ateNdu ras keleng atendu si tetap, si nai-nai nari icidahkenNdu.

⁷Alemi dosa ras kesalahenku, tupung aku nguda, inget min aku, sue ras kiniulinNdu dingen keleng ateNdu si tetap.

⁸Sabap TUHAN bujur dingen mehuli, kalak perdosa iajariNa gelah erdalan arah patutna.

⁹Iajarina kalak meteruk rukur, maka iikutkenna peratenNa.

¹⁰Man kerina kalak si patuh kempak perpadanenNa dingen ngikutken peratenNa, itegu-teguNa alu tutus ras dem keleng ate.

¹¹Erkiteken gelarNdu alemi min aku, sabap melala kal dosa-dosangku.

¹²Kalak si patuh iajarken TUHAN kap, dalan si arus idalanina.

¹³Geluhna tetap senang, kempu-kempuna ngaloken pusaka.

¹⁴Kalak si patuh teman TUHAN kap, perpadanenNa ras ia ipeteguhiNa pe.

¹⁵Aku tetap nare ku TUHAN nimai penampatNa, ipulahiNa aku i bas cilaka nari.

¹⁶O TUHAN, nehen min aku, mekuah min ateNdu kempak aku sabap kalak si la megegeh dingen kelungunen me aku.

¹⁷Penahangi ukurku i bas kendelenku nari, pulahi min aku i bas kesusahenku.

¹⁸Perdiateken min kendelenku ras kiniseranku, dingen alemi min kerina dosangku.

¹⁹Nehenlah uga lalana musuhku, dingen uga nembehna atena kempak aku.

²⁰Jagai min aku kelinilah aku maka ola aku italuken, man baNdu aku reh mindo gelah aku ikawali.

²¹Kiniulin dingen kebujurenlah si ngkawali aku, sabap aku ernalem man baNdu.

²²O Dibata pulahi min Israel bangsaNdu, i bas kiniseranna nari.