Read Batak Karo MASMUR 26 Bible Online

MASMUR 26 - Batak Karo bible

MASMUR 26

¹I bas Daud nari. Bereken min man bangku keadilen, o TUHAN, sabap si mehuli nge kulakoken. Aku erpengarapen man baNdu saja TUHAN, la sitik pe ukurku monce-once.

²Ujilah aku, pepayolah, o TUHAN, pereksalah sura-sura ras perukurenku.

³Keleng ateNdu, tetap ngarak-ngarak aku, janah aku tetap erkemalangen man baNdu.

⁴Aku la nggit erteman ras kalak penipu, ras kalak si pekulah-kulah la aku nggit rembak.

⁵Nembeh ateku man kalak jahat, kalak penipu kusilahken.

⁶O TUHAN, kuburihi tanku tanda aku la ersalah, dingen ikut ngkeleweti batar-batarNdu lako nembah man baNdu,

⁷janah ngendeken ende-enden pengataken bujur dingen meritaken kerna perbahanenNdu si mejin.

⁸Ngena ateku rumah inganNdu tading o TUHAN, inganNdu tading i bas kemulian.

⁹Ola bunuh aku radu ras kalak perdosa, ola buat kesahku radu ras kalak pemunuh,

¹⁰si katawari pe erbahan jahat, dingen katawari pe nggit mereken sogok.

¹¹Tapi kulakoken nge kai si benar, o TUHAN, mekuah min ateNdu, pulahi aku.

¹²E maka terkawal aku, la kena cilaka, kupuji TUHAN i bas perpulungen bangsaNa.