Read Batak Karo MASMUR 27 Bible Online

MASMUR 27 - Batak Karo bible

MASMUR 27

¹I bas Daud nari. TUHAN kap terang kegeluhenku Ia kap si ngkelini aku la lit si kubiarken TUHAN kap bentengku, e maka la aku gentar.

²Tupung kalak jahat nerang aku dingen ibunuhna atena aku, tertuktuk ia jenari guling.

³Aminna pe aku ikepung tentera si nterem, la mbiar aku. Aminna pe musuh reh ngelawan aku, aku tetap erpengarapen man Dibata.

⁴Sada ngenca pemindonku man TUHAN, sada ngenca sura-surangku e me ringan i bas Rumah TUHAN kidekah geluhku guna nggejapken kiniulin TUHAN dingen mindo gelah itegu-teguNa.

⁵Tupung paksa kesusahen TUHAN si ngkawali aku, ibunikenNa aku i bas RumahNa, iangkatNa aku ku das deleng batu.

⁶Genduari menang aku naluken imbang-imbang i sekelewetku; e maka alu surak-surak si meriah kupersembahken persembahen pengataken bujur i bas RumahNa. Jenari rende aku muji TUHAN.

⁷O TUHAN, begiken min tupung aku erlebuh man baNdu, mekuah min ateNdu dingen aloi min aku!

⁸NiNdu, “Mari sembah Aku.” Ningku, “Minter aku reh, TUHAN.”

⁹Ola Kam cebuni man bangku, ola Kam nembeh man bangku aku suruh-suruhenNdu, ola min aku ipelawesNdu. Sabap Kam kap penampatku, ola tadingken aku. O Dibata, Kam kap si ngkelini aku.

¹⁰Aminna pe itadingken nande ras bapangku aku tapi TUHAN tetap si pekena-kena aku.

¹¹O TUHAN, ajari aku nggeluh rikutken peratenNdu arah dalan si salang babai min aku sabap nterem kap imbangku.

¹²Ola endesken aku kempak musuh-musuhku, si nerang aku alu ngancam dingen alu saksi-saksi perguak.

¹³Tek aku maka kunanami me kiniulin TUHAN i bas kegeluhen enda.

¹⁴Ernalemlah man TUHAN. Teklah, tetapkenlah ukurndu. Ernalemlah man TUHAN.