Read Batak Karo MASMUR 29 Bible Online

MASMUR 29 - Batak Karo bible

MASMUR 29

¹Masmur Daud. Pujilah TUHAN o si nasa nggeluh i Surga, pujilah kemulian ras kuasaNa. [32†]

²Pujilah gelar TUHAN si Mulia, erjimpuh i adep-adepen si Badia, tupung icidahkenNa baNa.

³Sora TUHAN erlenggur i babo lawit, soraNa ergeruhguh i datas lau.

⁴Sora TUHAN dem gegeh, sora TUHAN dem kuasa.

⁵Sora TUHAN menggelken batang-batang kayu, aminna pe batang cemara Libanon.

⁶Deleng Libanon lompat-lompat ibahanNa, desken anak lembu. Deleng Hermon mengkat-engkat, desken anak banteng.

⁷Sora TUHAN erlenggur, erbahanca kilap erkinar.

⁸Sora TUHAN erbahanca taneh mesawang mugur-ugur, gurun Kades ibahanNa mundu-undu.

⁹Sora TUHAN ngugur batang kayu i kerangen, erbahanca bulung-bulung nartaren, i bas Rumah Dibata bangsaNa ersurak, “Pemuliakenlah Dibata!”

¹⁰ TUHAN erkuasa i babo banjir si mbelin, Ia merentah rasa lalap seh rasa lalap.

¹¹ TUHANlah si mere gegeh man bangsaNa, mereken dame arah pasu-pasuNa.