Read Batak Karo MASMUR 3 Bible Online

MASMUR 3 - Batak Karo bible

MASMUR 3

¹Masmur Daud kenca ia lompat i bas anakna Absalom. [5†]

²O TUHAN, nterem kal musuh-musuhku, nterem kal si ngelawan aku!

³Icakapkenna aku nina, “Labo isampati Dibata ia.”

⁴Tapi Kam o TUHAN, Kam kap ampang-ampangku iberekenNdu kemenangen man bangku; janah ipetetapNdu ukurku.

⁵Erlebuh aku mindo penampat man TUHAN, janah ialoiNa aku i datas delengNa si badia nari.

⁶Medem aku, jenari tertunduh, janah gedang-gedang berngi ikawali TUHAN aku.

⁷La aku mbiar musuhku meribu-ribu si arah japa pe ngkepung aku.

⁸Mari o TUHAN, pulahi aku o Dibatangku! IukumNdu kerina musuh-musuhku seh maka lanai ia ergegeh ngelawan aku.

⁹Kemenangen rehna i bas TUHAN nari kap; ipasu-pasu Dibatalah bangsaNa.