Read Batak Karo MASMUR 30 Bible Online

MASMUR 30 - Batak Karo bible

MASMUR 30

¹Ende-enden mengket Rumah Pertoton. Masmur Daud.

²Kupuji Kam o TUHAN, sabap enggo ikeliniNdu aku. La ipediatNdu imbang-imbangku, megombang man bangku.

³O TUHAN Dibatangku, erlebuh aku man bandu mindo penampat, e maka ibahanNdu aku juah-juahen.

⁴IpulahiNdu aku i bas kuburen nari, aku enggo i bas dalan kempak doni kematen, tapi ipegeluhNdu aku mulihi.

⁵Endekenlah puji-pujin man TUHAN, o kam kerina si patuh. Ingetlah perbahanen TUHAN si Badia, katakenlah bujur man baNa.

⁶Pernembeh ateNa kentisik ngenca, kiniulinNa tetap asa umur geluhta. Iluh mambur i bas berngi si gelap, tapi kenca matawari mbincar erpagi-pagi reh keriahen.

⁷I bas kesenangenku ningku i bas ukurku, “La ndigan pe aku talu!”

⁸Sabap mehuli Kam kempak aku, o TUHAN, ibahanNdu aku desken benteng i deleng-deleng. Tapi kepeken cebuni Kam man bangku, e maka mbiar aku.

⁹O TUHAN erlebuh aku baNdu, mindo perkuah ateNdu.

¹⁰“Kai kin gunana baNdu adi mate aku? Kai kin untungNdu adi ikuburken aku? Banci kin abu muji Kam? Banci kin iberitakenna kerna kiniulinNdu si la erkeri-kerin?

¹¹Begiken min pertotonku dingen mekuah min ateNdu, sampati aku, o TUHAN!”

¹²Kendelenku enggo isalihkenNdu jadi keriahen, e maka landek-landek aku alu meriah.

¹³E maka la aku nggit sinik, kuendeken puji-pujin man baNdu. TUHAN Kam kap Dibatangku, lalap kukataken bujur man baNdu!