Read Batak Karo MASMUR 31 Bible Online

MASMUR 31 - Batak Karo bible

MASMUR 31

²Ku Kam aku cicio o TUHAN ola pelepas aku kemalun. Kam kap Dibata si bujur, mindo aku, maka ikeliniNdu aku.

³Begiken min pertotonku pedas min Kam reh mulahi aku. Jadi min Kam deleng batu inganku cicio, kubungku si nteguh inganku terkawal.

⁴Kam kap ingan cebuni dingen bentengku, tegu-tegu dingen babai aku erkiteken gelarNdu.

⁵Tegu-tegu aku maka ola aku kena siding itogeng kalak man bangku. Ampang-ampangi aku maka ola aku kena cilaka.

⁶Kuendesken geluhku bas tanNdu, o TUHAN kam kap si ngkelini aku. Kam kap Dibata si Setia. [33†]

⁷Nembeh ateNdu kalak si nembah man dibata-dibata si palsu, tapi aku ernalem man baNdu.

⁸Ersurak dingen meriah kuakap, sabap Kam tetap ngkelengi aku. IdahNdu kiniseranku, ietehNdu kesuhsahenku.

⁹La ipediatNdu aku itangkap musuh-musuhku, tapi iberendu aku lawes ku ja ateku.

¹⁰Mekuah min ateNdu aku o TUHAN, sabap aku i bas kiniseran. Besar matangku ndekahsa tangis, lanai lit sitik pe gegehku.

¹¹Wari-wari geluhku kudalani i bas kepiceten, tangisku pegendek umur geluhku. Kote aku perban kiniseran-kiniseranku, seh maka enggo mumuk pe tulan-tulanku.

¹²Pergeluhku jadi pertawa-tawan man imbang-imbangku, teman-teman sada kesain megombang man bangku. Kerina kalak si nandai aku sengget ngidah aku, tupung kami simbel kiam ia kerina.

¹³Ipebalina aku ras barang si la terpake, dingen ilupakenna desken kalak mate.

¹⁴Kubegi imbang-imbangku erkusik-kusik, e maka kebiaren lit sekelewetku. Erpekat ia ngelawan aku isurakenna munuh aku.

¹⁵Tapi Kam kap pengarapenku, o TUHAN, Kam kap Dibatangku.

¹⁶Kidekah umur geluhku aku tetap i bas tanNdu pulahi aku i bas imbang-imbangku nari, i bas kalak si ngayak-ngayak aku.

¹⁷Perdiateken min aku suruh-suruhenNdu, erkiteken kiniulinNdu erkiteken keleng ateNdu, kelini min aku.

¹⁸Erlebuh aku man baNdu o TUHAN, ola pediat aku kemalun. Bahanlah maka juru me kalak jahat alu lanai ngerana lawes ia kubas doni kematen.

¹⁹Sompel min babah kalak perguak, si megombang dingen meganjang rukur, si melasken cakap megombang man kalak bujur.

²⁰Andiko buena kiniulinNdu, si isikapkenNdu man si pemuliaken Kam! Kerina kalak meteh kai si ilakokenNdu, man kalak si cilinggem kempak Kam.

²¹IbunikenNdu ia i bas adep-adepenNdu, nandangi pertakin kalak jahat. IbunikenNdu ia i bas pemunin si sikap, nandangi imbang-imbangna si perancuk-ancuk.

²²Pujilah TUHAN! Andiko belinna keleng ate si icidahkenNa, tupung aku ikepung dingen iserang imbang.

²³Mbiar aku tupung e, janahku rukur ningku, “Aku enggo ipelawes i bas adep-adepenNdu nari. Tapi enggo ibegikenNdu pemindonku, tupung aku erlebuh mindo penampat.”

²⁴O kalak si patuh, kelengilah TUHAN! IpulahiNa kalak si patuh. Tapi kalak megombang iukum TUHAN bagi patutna.

²⁵Piherken dingen tetapkenlah ukurndu, o kam kerina si erpengarapen man TUHAN!