Read Batak Karo MASMUR 33 Bible Online

MASMUR 33 - Batak Karo bible

MASMUR 33

¹O kam kalak bujur, ersuraklah meriah i bas TUHAN. O kalak bujur, pujilah Ia.

²Alu kulcapi, katakenlah bujur man TUHAN, ergendang dingen rendelah man baNa.

³Endekenlah ende-enden si mbaru man baNa, alu mejile kuitlah kulcapi janah ersuraklah meriah.

⁴Ranan TUHAN kerina tuhu, dingen kerina perbahanenNa terarapken tuhu.

⁵Ngena ate TUHAN kebujuren dingen keadilen, keleng ateNa rasa lalap ndemi doni enda.

⁶Alu perentahNa jine TUHAN njadiken langit jadi me matawari bulan ras bintang-bintang bekas kataNa.

⁷Lau lawit ipepulungNa kerina i bas sada ingan, lawit si mbelang itombengna maka ola mambur.

⁸O doni kerina, mbiarlah man TUHAN! O bangsa-bangsa i doni pemuliakenlah Ia.

⁹Adi ngerana Ia e maka jadi minter, iperentahkenNa e maka lit kerina.

¹⁰Igagalken TUHAN rencana bangsa-bangsa sura-sura bangsa doni isia-siakenNa.

¹¹Tapi rencana TUHAN tetap rasa lalap, sura-suraNa la masap rasa lalap seh rasa lalap.

¹²Malem kal ate bangsa si ngakui TUHAN jadi Dibatana, sangap kal bangsa si terpilih jadi sikerajangenNa.

¹³Natap TUHAN i Surga nari, ngenen kerina jelma manusia.

¹⁴I bas kerina kinirajanNa nari iperdiateken TUHAN kerina kalak si ngiani doni enda.

¹⁵Kerina perukuren manusia ibentukNa, dingen ietehNa perbahanen manusia kerina.

¹⁶Raja menang labo erkiteken teremna tenterana, kalak si mbisa terkelin labo perban gegehna.

¹⁷Kuda perang la terarapken guna ndatken kemenangen, gegehna si mbelin la banci ngkelini.

¹⁸ TUHAN ngkawali kalak si ngikutken Ia, kalak si ernalem man keleng ateNa si la ersibar.

¹⁹IpulahiNa kalak si erkemalangen bana i bas kematen nari, dingen tetap ipegegehNa tupung i bas kelihen pe.

²⁰ TUHAN saja sibahan pengarapenta, Ia kap penampat dingen si kawalta.

²¹Meriah ukurta erkiteken Ia, tek kita man gelarNa si Badia.

²²O TUHAN, kelengi min kami lalap, sabap kami erpengarapen man baNdu.