Read Batak Karo MASMUR 34 Bible Online

MASMUR 34 - Batak Karo bible

MASMUR 34

¹Masmur Daud, tupung ia tading i adep-adepen Abimelek, ipekulah-kulahna la demsa ukurna, jenari ipelawes Abimelek ia. [36†]

²Lalap aku ngataken bujur man TUHAN kupuji Ia la erngadi-ngadi.

³Kupuji Ia sabap perbahanenNa, kerina kalak si itindih begikenlah janah meriahlah.

⁴Marilah siberitaken kemulian TUHAN, mari radu ras kita muji gelarNa.

⁵Ertoto aku, ibegiken TUHAN pemindonku, ipulahina aku i bas kerina kebiarenku.

⁶Kalak si itindih erpengarapen man baNa, meriah ukurNa la aru pe atena.

⁷Kalak mesera erlebuh man baNa, janah ibegikenNa, ipulahiNa ia i bas kiniseran-kiniseranna.

⁸Malekat TUHAN ngkawali kalak si tutus, dingen mulahisa i bas si jahat nari.

⁹Malem kal ate kalak si cilinggem man baNa, penanam-nanamlah uga belinna kiniulin TUHAN. [37†]

¹⁰O kam bangsaNa, ikutkenlah TUHAN, kalak si tutus ngikutkenca lalap la kekurangen.

¹¹Singa pe kelihen erkiteken kurang nakan, tapi kerina si mehuli ibereken man kalak si ndarami TUHAN.

¹²O teman-temanku, marilah begiken aku, gelah kuajari kam uga pemuliaken TUHAN.

¹³Merincuh kam gedang umurndu, dingen ngenanami keriahen ras kesangapen? [38†]

¹⁴Ola belasken kata-kata jahat, ola erbual.

¹⁵Tadingkenlah kejahaten, lakokenlah kai si mehuli, bulatkenlah ukurndu erbahan perdamen.

¹⁶Kalak si tutus iperdiateken TUHAN, adi erlebuh ia ialoi TUHAN.

¹⁷Tapi kalak jahat iperimbangNa, e maka kenca ia mate mintes ilupaken.

¹⁸Erlebuh kalak bujur man TUHAN, ialoi TUHAN ia; ipulahiNa ia i bas kesusahenna.

¹⁹ TUHAN nemani kalak si lanai piher ukurna; isampatiNa kalak si enggo bene pengarapenna.

²⁰Kalak bujur pe mbue ngenanami kiniseran, tapi ipulahi TUHAN ia i bas kerinana nari.

²¹Badanna tetap ikawali TUHAN, e maka la lit sada pe tulanna si penggel. [39†]

²²Kalak jahat, mate perbahan kejahatenna, kalak si ernembeh ate man kalak bujur, la banci la iukum.

²³ TUHAN si mulahi bangsaNa, kalak si ndahi Ia mindo penampat, tentu ikawaliNa.