Read Batak Karo MASMUR 35 Bible Online

MASMUR 35 - Batak Karo bible

MASMUR 35

¹I bas Daud nari. O TUHAN, lawanlah kalak si ngelawan aku, peranglah kalak si merang aku.

²Pakelah ampang-ampang ras baju perangNdu, jenari reh Kam nampati aku.

³Angkatlah lembing ras kapakNdu, guna ngelawan kalak si ngelis aku. Kataken min bangku maka Kam kap keselamatenku.

⁴Bahanlah maka kalak si ersura-sura munuh aku, talu dingen juru. Janah kalak si erpekat munuh aku, surut dingen bene ukurna.

⁵Iayak malekat TUHAN ia, desken segal iembus angin.

⁶Ielis malekat TUHANlah ia, i dalan si gelap dingen medalit.

⁷Alu la ersabap, itogengna siding man bangku, ikalina lubang si mbages nangkap aku.

⁸Tapi alu la isangkana, kerneplah ia. Ia jinelah kena sidingna, jenari jertuh dingen merteh-erteh!

⁹E maka ersurak aku kerna TUHAN, meriah ateku sabap aku ikeliniNa.

¹⁰Ningku man TUHAN alu bulat ukurku, “La lit si terpeseri ras Kam! IkawaliNdu si la ergegeh i bas si megegeh nari, si musil-musil i bas si nindihsa nari.”

¹¹Kalak jahat nuduh aku dingen ersaksi, kerna kejahaten si la kueteh pe.

¹²Kiniulinku ibalasna alu kejahaten, e maka labuh kal ukurku.

¹³Tupung ia bangger, kupake baju tanda ate ceda, dingen erpuasa, jenari janahku tungkuk ertoto aku,

¹⁴kutotoken ia bali ras penotokenku kerna senina tah temanku kal. Tungkuk aku janahku tangis, bali ras kalak tangis erkiteken kepaten nande.

¹⁵Tapi tupung aku i bas kesusahen, meriah ukurna, jenari ikelewetina aku janahna nguru-nguru aku. Kalak si la kutandai mekpeki aku, alu la ngadi-ngadi.

¹⁶Tetap megombang ia bangku, alu ipen erderik ijerlengna aku.

¹⁷O TUHAN, asa kai nari dekahna Kam natap saja? Pulahi min aku sabap ijerngemna aku, kelini min geluhku i bas singa-singa e nari.

¹⁸E maka kukataken bujur man baNdu itengah-tengah perpulungen bangsaNdu, kupuji Kam i lebe-lebena kerina.

¹⁹Ola pelepas aku iguro-guroken kalak si ernembeh ate man bangku alu la ersabap. Ola pelepas aku isuraki, kalak si ernembeh ate man bangku alu la ersebap. [40†]

²⁰Rananna pegabuken, kalak si ngena atena perdamen icekurakina.

²¹Alu megang sorana isalahina aku nina, “Idah kami nge kai si ibahanndu.”

²²Tapi iidahNdu kap kerina o TUHAN, ola min tatap Kam ndauh dingen sinik saja.

²³Kekeken jenari kapiti min perkarangku! O Dibatangku, o TUHANku sampati min aku!

²⁴O TUHANku, sabap Kam bujur, kapiti min aku, ola pelepas aku isuraki imbangku.

²⁵Ola pelepas ia rukur i bas ukurna nina, “Untung ia mate! Sabap e kin sura-sura kami.”

²⁶Bahanlah maka si meriah akapna ngenen kiniseranku, italuken dingen bene ukurna. Bahanlah maka kalak si megombang bangku, juru dingen mela akapna.

²⁷Ersuraklah kalak si mejehe ngidah aku ibenarken, iulih-ulihinalah ngataken, “Andiko muliana TUHAN e! Ngena ateNa adi sangap suruh-suruhenNa”.

²⁸E maka kuberitaken kerna keadilenNdu, dingen kupuji Kam gedang-gedang wari.