Read Batak Karo MASMUR 38 Bible Online

MASMUR 38 - Batak Karo bible

MASMUR 38

¹Masmur Daud: perngandungen.

²O TUHAN, ola ukumNdu aku alu rawaNdu! Ola siksa aku alu pernembehNdu si gara.

³Leket panahNdu ngelukai badanku, kugejapken tanNdu mberat ndehken aku.

⁴Mesui kuakap perban pernembehNdu, mesui kerina dagingku erkiteken dosa-dosangku.

⁵Gedap aku i bas dosangku, dosa-dosangku mberatsa kuakap mabasa.

⁶Erkiteken kebodohenku, luka-lukangku enggo nanahen dingen mbau.

⁷Mungkuk takalku, getem kal pusuhku, gedang-gedang wari ceda ateku.

⁸Dagingku ngindet erkiteken penakit, la lit si mejuah-juah i bas dagingku.

⁹Ngalah kal dagingku dingen lanai kal lit gegehku, pusuhku getem, ndehereng aku ban suina.

¹⁰O TUHAN tehNdu kap kerina sura-surangku, kelsehenku pe terbegi man bandu.

¹¹Pusuhku debet-debet, keri gegehku, matangku pe enggo seleng.

¹²Teman-temanku enggo lanai nggit deher ras aku, perban ugahen dagingku, kade-kadengku pe nadingken aku.

¹³Kalak si atena munuh aku pe itogengna siding, gedang-gedang wari, si jahat saja irencanakenna, guna ncilakaken aku alu tipu si jahat.

¹⁴Tapi aku desken kalak pasek si la erpemegi, desken kalak pekak si la banci ngerana.

¹⁵Tuhu, aku desken kalak si la erpemegi, janah erkiteken si e la banci nogani.

¹⁶Tapi o TUHAN Kam saja kap pengarapenku dingen Kam kap, Tuhan Dibatangku, ngaloi aku.

¹⁷Ola pelepas imbang-imbangku ersenang-senang sabap kiniseranku, ola pelepas ia meganjang ngerana erkiteken kinitalunku.

¹⁸Menam aku guling janah lalap mesui kuakap.

¹⁹Kuakui kelepakenku, getem pusuhku erkiteken dosa-dosangku.

²⁰Imbang-imbangku megegeh dingen nterem, alu la ersabap nembeh atena aku.

²¹Ibalasna si mehuli alu si jahat, jenari imusuhina aku sabap kuayaki si bujur.

²²O TUHAN ola aku itadingkenNdu, o Dibatangku, ola Kam ndauh i bas aku nari.

²³Pedaslah Kam reh nampati aku, o TUHAN keselamatenku.