Read Batak Karo MASMUR 39 Bible Online

MASMUR 39 - Batak Karo bible

MASMUR 39

²Ningku i bas ukurku, “Metenget aku i bas perbahanenku, dingen la kubere dilahku erdosa. La aku ngerana, kidekah ndeher denga ras kalak jahat.”

³Sinik saja aku, si mehulina la kubelasken, tapi kiniseranku reh beratna.

⁴Serbut kal ukurku akin kuukurken, reh ndelena ateku, dungna ningku,

⁵“O TUHAN, kataken ndigan aku mate, asa kai umur geluhku, gelah kueteh ndigan peltep kesahku.”

⁶Andiko gendekna geluhku itadingkenNdu, la kap lit ertina umur geluhku i adep-adepenNdu. Tuhu, manusia la kap lebih asa sekali erkumesah ngenca,

⁷la lebih asangken sada awih. Kasa kai kelatihenna sia-sia nge kerina ipepulungna erta-erta si melala, tapi la ietehna ise denggo si makesa.

⁸Dage kai nari timanku, o Tuhan? Man baNdu nge aku erpengarapen.

⁹Pulahi min aku i bas kerina dosa-dosangku nari, ola pelepas aku igombang-gombangi kalak lenge.

¹⁰Sinik saja aku, kai pe la kubelasken, sabap Kam kap si erbanca ateku mesui.

¹¹Erkiteken penggudamNdu menam aku mate, olanai min aku iukumNdu.

¹²IukumNdu manusia dingen iberekenNdu kiniseran, erkiteken dosa-dosana, desken ngetnget, ikernepkenNdu kai si ngena ate manusia. Tuhu, manusia desken sekali erkumesah ngenca.

¹³O TUHAN, dengkehken min pemindonku perdiateken min sorangku tangis, ola tadingken aku. Bali ras kerina nini-niningku, kentisik ngenca aku kesilang ras Kam.

¹⁴Tadingken min aku, maka banci aku ersenang-senang, ope denga aku lawes dingen masap.