Read Batak Karo MASMUR 40 Bible Online

MASMUR 40 - Batak Karo bible

MASMUR 40

²Alu ukur sabar kutimai penampat TUHAN, ibegikenNa aku janah iperdiatekenna perserkongku.

³IrintakNa aku i bas lubang cilaka nari, ipedaratNa aku i bas kubang si mbages nari. Maka tetap pertedisku, itamakenNa aku i datas deleng batu.

⁴IajarkenNa bangku ende-enden si mbaru, e me ende-enden pujin man TUHAN. Nterem kalak ngidah dingen mbiar, jenari tek kempak TUHAN.

⁵Sangap kalak si ernalem man TUHAN, kalak si la nggit nembah man berhala-berhala, si la ikut ras kalak si nembah man dibata-dibata si la tuhu.

⁶Enggo melala kal perbahanenNdu si mehuli man kami o TUHAN Dibata kami, la lit si seri ras Kam! Andiko lalana rencana si mehuli si enggo ibahanNdu guna kami, la terturiken aku kerina perban lalana.

⁷Persembahen gelehen dingen persembahen pangan la Kam merincuh, persembahen pengalemi dosa la ipindoNdu. Tapi enggo iberekenNdu pinggel man bangku, si banci megiken soraNdu. [43†]

⁸E maka ningku ngaloi, “I jenda aku; i bas kitapNdu isuratken kerna aku.

⁹O Dibata ngena ateku ndalanken peratenNdu, pengajarenNdu kubuniken i bas pusuhku.”

¹⁰O TUHAN, i bas perpulungen bangsandu kumomoken, berita si mehuli kerna keselamaten si iberekenNdu. IetehNdu kap e TUHAN, maka la pernah aku ngadi ngerana kerna si e.

¹¹I bas perpulungen bangsaNdu la pernah aku sinik, berita keselamaten la pernah kurusiaken. Asa lalap kumomoken, kerna kesetianNdu, penampatNdu dingen keleng ateNdu si la ermasap-masap.

¹²O TUHAN, kueteh maka gelgel ateNdu keleng nandangi aku, keleng ate dingen kesetianNdu rasa lalap ngkawali aku.

¹³Kiniseran si ngkeleweti aku, la terbeligai lalana. Dosa-dosangku ngelis-ngelis aku, e maka lanai aku erpengidah. Teremna imbang-imbangku, lalan asa buk i bas takalku, em erbahanca bene ukurku.

¹⁴O TUHAN kelini min aku, sampati min aku genduari.

¹⁵Bahanlah maka kalak si atena munuh aku, talu dingen bene ukurna. Janah kalak si ersurak ngenen kesusahenku, surut dingen mela akapna.

¹⁶Tersenggetlah dingen melalah iakap kalak si nawa-nawai aku.

¹⁷Ersuraklah dingen meriahlah ia kap si ndarami Kam. Kerina kalak si ngataken bujur perban enggo ikeliniNdu ia, tetaplah ngataken, “Andiko muliana TUHAN!”

¹⁸O TUHAN, aku enda kalak si la ergegeh dingen musil, tapi la aku ilupakenNdu. Kam kap penampatku dingen si mulahi aku, o Dibatangku, rehlah Kam genduari.