Read Batak Karo MASMUR 42 Bible Online

MASMUR 42 - Batak Karo bible

MASMUR 42

¹Ende-enden anak-anak si Korah.

²Bagi belkih mejehe nandangi lau maler si malem, bage me tedehna ateku Kam, o Dibata.

³Muas tendingku man baNdu o, Dibata si nggeluh, ndigan aku banci ersembah i adep-adepenNdu?

⁴Suari berngi aku ngandung, iluh ngenca si man panganku. Gedang-gedang wari nungkun imbang-imbangku, “I ja kin Dibatandu?”

⁵Getem pusuhku adi kuinget paksa si enggo lepas, tupung aku mabai perpulungen lawes ku Rumah Dibata. Erdalan aku arah lebe arak-araken, ersurak-surak dingen ngendeken ende-enden pujin man Dibata.

⁶Engkai maka ndele ateku? Engkai maka susah kuakap? Ku Dibata saja aku erpengarapen, jenari kupuji ka Ia tole, si engkelini aku dingen penampatku.

⁷ [7-8] I jenda, i taneh pembuangen enda getem kal pusuhku, e maka teringet aku man TUHAN. Gedap aku i bas galumbang ate ceda, keguluten ngombakken aku, desken Lau Jordan si ergeruhguh, i Deleng Hermon dingen Deleng Misar nari.

⁹Icidahken TUHANlah keleng ateNa si tetap tupung siang wari, maka banci aku rende tupung berngi, jenari ertoto man Dibata ulu kegeluhen.

¹⁰Ningku man Dibata, penampatku, “Engkai maka lanai ingetNdu aku? Engkai maka tetap ceda ateku, erkiteken itindih musuh-musuhku?”

¹¹Getem pusuhku sabap iuru-uru musuhku aku. Nina gedang nu wari, “I ja Dibatandu?”

¹²Engkai maka ndele ateku? Engkai maka susah kuakap? Ku Dibata saja aku erpengarapen jenari kupuji Ia tole, si engkelini aku dingen penampatku.