Read Batak Karo MASMUR 43 Bible Online

MASMUR 43 - Batak Karo bible

MASMUR 43

¹O Dibata kapiti min perkarangku, nandangi kerina kalak jahat. Cidahkenlah maka labo aku ersalah, pulahi min aku i bas kalak jahat ras penipu nari.

²Kam kap pengawalku, ngkai maka aku itadingkenNdu? Engkai maka tetap ceda ateku erkiteken itindih imbang-imbangku?

³Cidahken kesetianNdu lako nalsali aku, gelah aku ibabaina mulih ku Sion, deleng si badia, jenari kudahi ku rumahNdu.

⁴Maka kudahi batar-batarNdu, o Dibata, Kam kap ulu kemalemen ateku. Janah ngkuit kulcapi rende me aku muji Kam, o Dibata, o Dibatangku.

⁵Engkai maka ndele ateku? Engkai maka susah kuakap? Ku Dibata saja aku erpengarapen, jenari kupuji Ia tole, Si Engkelini aku dingen penampatku.