Read Batak Karo MASMUR 44 Bible Online

MASMUR 44 - Batak Karo bible

MASMUR 44

¹Ende-enden anak Korah.

²O Dibata, enggo ibegi kami turi-turin si ituriken nini-nini kami, kerna perbahanen si mbelin si enggo ilakokenNdu i bas paksa si enggo lepas.

³Kam jine si pelawessa bangsa-bangsa si deban, gelah bangsaNdu banci ngiani negerina. Bangsa-bangsa si deban icilakakenNdu, tapi bangsaNdu ipelepasNdu reh teremna.

⁴Iingani bangsaNdu negeri e labo perban pedang, labo perban gegehna jine maka ia menang, tapi erkiteken kuasa dingen gegehNdu, perban tetap ia itemanindu, si encidahken maka ia ikelengiNdu.

⁵Kam kap rajangku dingen Dibatangku, si mereken kemenangen man bangsaNdu.

⁶Alu kuasaNdu italuken kami musuh kami i bas gelarNdu iperjati kami musuh kami.

⁷Sabap labo kami ernalem man panah kami, pedang kami labo mereken kemenangen man bangsa kami.

⁸Tapi Kam kap si enggo engkelini kami i bas imbang-imbang kami nari. Kalak si ernembeh ate man kami, ijurukenNdu ia.

⁹E maka gedang-gedang wari Kam ipuji kami, dingen asa lalap kami ngataken bujur man baNdu.

¹⁰Tapi genduari itulakNdu kami, ipelepasNdu kami italuken. Lanai Kam erperang radu ras tentera kami.

¹¹IpelepasNdu kami ielis-elis imbang si ngerampasi erta kami.

¹²IpelepasNdu kami igeleh bali ras biri-biri, ihuntakkenNdu kami itengah bangsa-bangsa.

¹³IdayakenNdu bangsaNdu alu la meherga, arah tukurna nari la lit untungndu sitik pe.

¹⁴Teman-teman kami ngidah perbahanenNdu man kami, i uru-uruna dingen itawa-tawaina kami.

¹⁵IbahanNdu maka kami jadi pertawa-tawan i tengah bangsa si deban, ngupir ia janah igombangina kami.

¹⁶Gedang-gedang wari kami ipandangi, lalap mela iakap kami,

¹⁷megiken penguru-nguru janah kata megombang, si luar i bas imbang dingen kalak si ernembeh ate man kami.

¹⁸Kerina e enggo nindih kami, aminna pe la kami lupa man bandu, janah la ilanggar kami perpadanen si ibahanNdu ras kami.

¹⁹Labo kami la patuh, labo la iikutken kami perentah-perentahNdu.

²⁰Tapi itadingkenNdu kami i bas gelap mesangat; i tengah-tengah rubia-rubia si meliar.

²¹Adi lanai kami nembah Kam o Dibata kami, tapi ertoto man dibata-dibata si deban,

²²tentu enggo ietehNdu, sabap idahNdu kap terus ku bas perukuren kami si terbuni.

²³Erkiteken Kam nge maka kami tetap iancam kematen, kami ipeseri ras biri-biri si man gelehen. [46†]

²⁴Kekeken! Engkai maka Kam tunduh, Tuhan? Tedisken! Ola rasa lalap kami itulakNdu.

²⁵Engkai maka Kam cebuni? Engkai maka Kam lupa kiniseran ras kesusahen kami?

²⁶Ampar getem kami i babo taneh, terdang i bas abu erkiteken talu.

²⁷Rehlah Kam nampati kami, kelini min kami erkiteken keleng ateNdu si tetap.