Read Batak Karo MASMUR 46 Bible Online

MASMUR 46 - Batak Karo bible

MASMUR 46

¹Ende-enden anak Korah.

²Dibata kap kecion dingen gegehta, lalap ia sikap nampati katawari kita i bas kesusahen.

³E maka la kita gentar, aminna pe doni mundu-undu, janah deleng-deleng gedap ku teruh lawit;

⁴Aminna pe lawit ergalumbang dingen rugup-ugup, dingen deleng-deleng pe kumetter itendengna.

⁵Lit kap lau mbelin si mereken keriahen man kuta Dibata, kuta ingan tading Dibata si Meganjangna.

⁶I je kap Dibata ringan, e maka labo ndigan pe kernep kuta e, sabap iberekenNa penampat tupung matawari pultak.

⁷Dibata erlenggur, e maka melengas doni enda; bangsa-bangsa gentar, kerajan-kerajan mugur-ugur.

⁸ TUHAN si Mada Kuasa kap ras kita, Dibata nu Jakup kubu pertahanenta.

⁹Mari nehenlah perbahanen TUHAN, ibahanNa kesenggeten i doni.

¹⁰IpengadiNa perang i belang-belang doni enda, panah iripukkenNa, lembing ipenggelkenNa.

¹¹Nina, “Pengadilah erperang, ertikenlah maka Aku kap Dibata. Aku kap si Meganjangna i bas bangsa-bangsa si Meganjangna i belang-belang doni enda.”

¹² TUHAN si Mada Kuasa kap si ras kita, Dibata nu Jakup kubu pertahanenta.