Read Batak Karo MASMUR 47 Bible Online

MASMUR 47 - Batak Karo bible

MASMUR 47

¹Ende-enden Korah.

²Ertepuklah alu meriah, o bangsa-bangsa! Pujilah Dibata alu ersurak-surak si meriah!

³ TUHAN si Meganjang tuhu-tuhu rejin kap. Ia kap Raja si Mulia si merentah kerina doni enda.

⁴IberekenNa man banta kemenangen naluken bangsa-bangsa, ibahanNa kita jadi penguasa kerina doni enda.

⁵IpilihNa negeri man inganta tading, si jadi kemegahen man bangsa si ikelengiNa.

⁶Dibata enggo nangkih ku das kursi kinirajanNa, iikutken surak si meriah ras sora terompet.

⁷Endekenlah ende-enden pujin man Dibata, ende-enden pujin man Dibatanta!

⁸Dibata kap Raja kerina doni enda, alu ende-enden pujilah Ia!

⁹Dibata kundul i datas kursi kinirajanNa, Ia kap si merentah bangsa-bangsa.

¹⁰Pulung kerina peminpin bangsa-bangsa, ersada ras bangsa Dibata si isembah Abraham. Sabap Dibata kap Raja si Mulia, gegehen pe Ia asangken kerina tentera.