Read Batak Karo MASMUR 51 Bible Online

MASMUR 51 - Batak Karo bible

MASMUR 51

¹ [1-2] Man peminpin Masmur. Ende-enden enda ikarang Daud kenca Nabi Natan reh njumpai ia erkiteken-kiteken la mehuli laguna ras Batseba. [50†]

³O Dibata mekuah min ateNdu kempak aku, erkiteken liasNdu, sasapkenlah dosangku, erkiteken perkuah ateNdu.

⁴Peridi min aku maka masap kejahatenku, urasi min aku maka masap dosangku.

⁵Salah lepakku kueteh nge, dosangku pe rusur kuinget.

⁶Man baNdu, man baNdu saja ngenca aku erdosa, kubahan si jahat i bas pengakapNdu. E maka patut nge aku iukumNdu, janah bujur nge keputusenNdu. [51†]

⁷I bas kesalahen kap tubuhku ndube, sabap i bas bertin nari pe enggo ikuasai dosa aku.

⁸Ukur si pinter ras kebujuren nge si ipindoNdu, dage demilah pusuhku alu kepentarenNdu.

⁹Aguilah dosangku, maka aku bersih, peridi min aku maka bentaren aku asangken kapas.

¹⁰Pedengkehken min man bangku berita keriahen, maka ersurak ka pusuh si enggo igetemkenNdu enda.

¹¹Pitpitkenlah mataNdu maka ola idahNdu dosangku, sasapken min kerina salah lepakku.

¹²Tepa min ukur si meciho i bas aku o Dibata, jenari pelimbarui min pusuhku jadi pusuh si erkemalangen.

¹³Ola aku ibuangNdu i bas adep-adepenNdu nari, dingen ola ibuatNdu kesahNdu si badia i bas aku nari.

¹⁴Bereken min bangku keriahen erkiteken aku enggo ikeliniNdu, dingen bahanlah maka meriah ukurku erkemalangen man baNdu.

¹⁵Kenca bage banci kuajarken perentah-perentahNdu man si perdosa, gelah mulihken ia man baNdu.

¹⁶Kelinilah kesahku, o Dibata keselamatenku, gelah alu meriah ukur kumomoken kebujurenNdu.

¹⁷Sampati aku ngerana, o TUHAN, gelah kupuji Kam.

¹⁸Persembahen gelehen la ateNdu bage, aminna pe kupersembahken, la pet Kam persembahen tutungen.

¹⁹Persembahen si ngena ateNdu o Dibata, e me pusuh si getem; ukur meteruk dingen jera e me si la itulakNdu.

²⁰O Dibata, cidahken min lias ateNdu man Sion, panteki min mulihi tembok-tembok Jerusalem.

²¹Kenca bage meriah me ukurNdu ngaloken persembahen si patut, e me persembahen tutungen si ipersembahken kami baNdu, jenggi lembu ipersembahken me i datas batar-batarNdu.