Read Batak Karo MASMUR 55 Bible Online

MASMUR 55 - Batak Karo bible

MASMUR 55

¹Ende-enden Daud.

²O Dibata, begikenlah pertotonku, ola tundalken pemindonku.

³Dengkehken dingen aloi min aku, latih kuakap perbahan kesusahenku.

⁴Mbiar kal aku erkiteken iancam musuhku, sedak kuakap perban itindih kalak jahat. Isuhsahina geluhku, dingen alu nembeh atena ilawanna aku.

⁵Nggirgir kal aku, mbiar man kematen si ngerimrim aku.

⁶Mbiar dingen gentar kal aku, janah ngeri kal kuakap.

⁷Adi lit min ndai kabengku bagi nderapati, kabang aku ndarami ingan si teneng.

⁸Ndauh kal aku kabang, jenari i gurun pasir aku tading.

⁹Minter kudarami ingan cio-cio, maka ola aku kena angin erpiu ras angin kaba-kaba.

¹⁰Sontarken ranan musuhku o TUHAN, sabap kuidah kejahaten dingen keguntaren i kuta.

¹¹Suari berngi ikelewetina kuta e, kejahaten dingen mara dem i je.

¹²I jah i je lit kalak encedai, pasar-pasarna dem alu kalak si dahinna nindih ras nipu.

¹³Adi kin musuh nge si nokohi aku, tahan nge aku. Adi imbang nge si megombang man bangku, banci denga aku cebuni.

¹⁴Tapi kam jine, o teman, temanku meriah, kandu-kandungku, kam enggo salih jadi imbangku.

¹⁵Mbarenda meriah kal bualta, dingen ras-ras kita ersembah ku bas Rumah Pertoton.

¹⁶Mate rempetlah musuh-musuhku, geluh-geluhenlah ia nusur ku bas doni kalak mate. Sabap kejahaten kap isi rumahna, bage pe i bas pusuhna.

¹⁷Tapi erlebuh aku man TUHAN Dibata, jenari isampatiNa nge aku.

¹⁸Suari ras berngi aku erlebuh dingen tangis, janah ibegiken TUHAN nge sorangku.

¹⁹IbabaNa aku mulih alu mejuah-juah, i bas perang ngelawan musuh si nterem.

²⁰Dibata kap si merentah nai-nai nari, ibegikenNa nge aku dingen italukenNa me imbangku. Sabap la ia nggit robah, dingen la ia mbiar man Dibata.

²¹Teman-temanku mbarenda ermusuhen ras teman-temanna, ipersilahangna perpadanenna.

²²Rananna tuhu medate, tapi pusuhna dem nembeh ate. Cakapna medalit bagi minak, tapi nebak desken pedang si entelap.

²³Endesken aru atendu man TUHAN, gelah kam ipegegehiNa. Sabap la pernah ipediatNa, kalak bujur italuken.

²⁴Tapi Kam, o Dibata, iambekkenNdu me, kalak pemunuh ras penipu ku bas lubang si lanai tanggung bagesna. Kalak si bage, la nggeluh setengah umur pe. Tapi aku ernalem i bas Kam.