Read Batak Karo MASMUR 56 Bible Online

MASMUR 56 - Batak Karo bible

MASMUR 56

¹Masmur Daud tupung ia itangkap bangsa Pilisti i Gat. [56†]

²O Dibata mekuah min ateNdu aku, sabap itindih musuhku aku, lalap aku iayak-ayakna.

³Gedang-gedang wari iserang musuhku aku, nterem kal kalak si ngelawan aku.

⁴Tupung aku mbiar, o Dibata si Meganjang, Kam saja penalemenku.

⁵O Dibata, Kam kap pengarapenku, e maka la mbiar aku. Kai kin banci ibahan kalak man bangku? Kupuji Kam kerna kai si ipadankenNdu.

⁶Gedang-gedang wari isuhsahi imbang-imbangku aku, lalap ia ersura-sura encilakaken aku.

⁷Pulung ia i bas inganna cebuni, jenari iperdiatekenna kai si kulakoken ndarami kesempaten lako munuh aku.

⁸Balas min kejahatenna, o Dibata, kernepken min ia alu pernembehNdu.

⁹IdahNdu kap uga belinna kiniseranku, iperdiatekenNdu iluhku mambur, ma e kerina enggo isuratken i bas kitapNdu?

¹⁰Tupung warina aku erlebuh man baNdu, o Dibata, surut imbang-imbangku kerina, sabap tek aku maka Kam kap ras aku.

¹¹Kupuji Kam, o Dibata, kerna si enggo ipadankenNdu.

¹²Kam kap pengarapenku, e maka la aku mbiar. Kai kin si banci ibahan kalak man bangku?

¹³O Dibata, kupersembahken baNdu kerina si enggo kupadanken, persembahen pengataken bujur kupersembahken baNdu.

¹⁴Sabap ipulahiNdu aku i bas kematen nari, jenari ikawaliNdu maka la aku talu. E maka banci aku erdalan i adep-adepen Dibata, i bas sinalsal si nerangi kerina si nggeluh.