Read Batak Karo MASMUR 58 Bible Online

MASMUR 58 - Batak Karo bible

MASMUR 58

²O kam si erkuasa, adil kang keputusenndu? Bujur kang putusenndu tupung kam ngadili kalak?

³Lang! Kam ngukurken si jahat i bas pusuhndu, dingen kejahaten si kejam ilakokenndu i bas negeri enda.

⁴Kalak jahat enggo papak i bas bertin nari kin, mulai tubuhna ndube pe enggo ia melasken kata la tuhu.

⁵Kalak jahat erbisa bagi nipe, pasek bagi upar isompelna pinggelna

⁶si la megi sora pawang si beluh, ntah sora tukang sihir si melasken mangmangna.

⁷O Dibata penggelken min ipenna, dekdek min sawit singa si merawa e, o TUHAN.

⁸Masaplah ia bagi lau lesap ku taneh, bagi dukut-dukut melus idedehi i bas dalan.

⁹Meleburlah ia desken kacunggi si terdedeh, desken anak si merurus la sempat ngidah wari terang.

¹⁰Alu la isangka-sangka irenteslah ia bagi dukut, metua ntah nguda iraprap pernembeh TUHAN ia kerina.

¹¹Ngidah kalak jahat enggo iukum, meriah iakap kalak bujur jenari iburihina nahena alu dareh kalak jahat.

¹²Bagenda me nina kalak pagi, “Tuhu lit nge upah kalak si bujur, lit kap Dibata si ngadili doni enda.”