Read Batak Karo MASMUR 60 Bible Online

MASMUR 60 - Batak Karo bible

MASMUR 60

¹Masmur pengajaren Daud,

²tupung ia merang kalak Aram-Mesopotami ras kalak Aram-Zoba, dingen tupung Joap mulih kenca munuh 12.000 kalak bangsa Edom. [59†]

³Alu rawaNdu enggo kami italukenNdu, jenari ibuangNdu kami, o Dibata, tapi genduari mulihkenlah ku kami.

⁴IugurNdu pertibi enda seh merigat, pekena-kena min si pecah-pecah, sabap enggo mundu-undu.

⁵Kami bangsaNdu ipelepasNdu i bas kiniseran si mesangat, e maka mbewat-mbewat kami bali ras kalak mabuk.

⁶Man kalak si erkemalangen man baNdu iberekenNdu pertenget, maka ia pulah i bas ukumen nari.

⁷Selamatken kami alu kuasaNdu, dengkehkenlah pertoton kami, gelah bangsa si ikelengiNdu banci pulah. [60†]

⁸I bas inganNa si badia nari ngerana Dibata nina, “Alu meriah ukur taneh Sikem Kubagi-bagi. Baluren Sukot nandangi Kubagi-bagiken man bangsangKu.

⁹Gileat ras Manase Aku nge empuna, Eperaim e me topi wajangKu, Juda e me ciken kinirajanKu.

¹⁰Tapi Moap e kap ingan pemurihi nahengKu, man Edom kuambekken sepatungKu, tandana maka ia sikerajangenKu. Ersurak Aku perban menang Aku ngelawan bangsa Pilisti.”

¹¹Ise si mabai aku ku kuta si erbenteng e? Ise maba aku ku Edom, o Dibata?

¹²O Dibata, tuhu ibuangNdu ateNdu kami? Lanai ateNdu ikut ras tentera kami?

¹³Sampati min kami naluken imbang, sabap sia-sia nge penampat manusia!

¹⁴Ras Kam o Dibata menang me kami, Kam kap si ndedeh musuh kami.