Read Batak Karo MASMUR 63 Bible Online

MASMUR 63 - Batak Karo bible

MASMUR 63

¹Masmur Daud tupung ia i padang gurun Judea. [62†]

²O Dibata, Kam kap Dibatangku, kudarami dingen tedeh ateku Kam. Mesikel kal aku nandangi Kam. Desken taneh tenggiring si kerah, bage me muasna tendingku man baNdu.

³Pelepas maka kuidah Kam i bas RumahNdu, maka kuidah kuasa ras kemulianNdu.

⁴KekelengenNdu si tetap ergan asangken kesah, e maka kupuji ateku Kam.

⁵Kidekah umur geluhku aku ngataken bujur man baNdu, kuangkat tanku tupung aku ertoto baNdu.

⁶Alu ende-enden si meriah kupuji Kam, desken man tabeh-tabeh ras utuk tulan, bage me ibesuriNdu tendingku.

⁷Tupung aku tayang i das ingan medemku, kuinget Kam; gedang-gedang berngi rukur aku kerna Kam.

⁸Sabap Kam kap si enggo nampati aku, i teruh kabengNdu rende aku perban riahna.

⁹Enteguh Kam kucikepi, terkelin aku perban tanNdu si megegeh.

¹⁰Tapi kalak si ersura-sura munuh aku, gedap me ku doni kalak mate.

¹¹Mate me ia i bas perang, jenari ipangani rubia-rubia si meliar.

¹²Meriah me ukur raja, sabap ibereken Dibata kemenangen man bana. Kalak si erpadan i bas gelar Dibata, ipujina me Ia. Tapi babah si melasken kata la tuhu isompel me kap.