Read Batak Karo MASMUR 65 Bible Online

MASMUR 65 - Batak Karo bible

MASMUR 65

¹Masmur Daud; ende-enden.

²O Dibata, patut maka ipuji kami Kam i Sion dingen ngkunduli padan si ibahan kami alu sumpah.

³Kam kap si megiken pertoton. Erkiteken enggo erdosa, kerina kalak reh man baNdu.

⁴Mberat kal dosa-dosa kami tapi keri kal ialemiNdu.

⁵Sangap kal kalak si ipilihNdu, dingen kalak si idiloNdu ringan i bas kesain RumahNdu. Puas iakap kami kerna kerina si mehuli si lit i bas RumahNdu, inganNdu si badia.

⁶IbegikenNdu kami alu mereken kemenangen man kami, ibahanNdu perbahanen si mejin guna ngkelini kami. Kerina bangsa-bangsa i babo doni enda, seh ku lepar lawit si mbelang erkiniteken man baNdu.

⁷Alu gegehNdu ipecinderNdu deleng-deleng i bas inganNa, guna encidahken kuasaNdu si mbelin.

⁸Kam si pejeneng geruhguh nu lawit, sora galumbang si pinger. Kam si pengadi perjengilen manusia.

⁹Kerina si ngiani doni enda nggirgir ras mehamat, ngidah perbahanenNdu si mbelin. I bas tampuk doni kutampukna si deban kerina rende ersurak erkiteken perbahanenNdu.

¹⁰IberekenNdu udan dingen ipekena-kenaNdu taneh enda, ibahanNdu maka mehumur ia gelah mbue asilna. Baluren lau idemiNdu alu lau, maka mbuah ulih juma kerina.

¹¹Taneh si enggo itenggalai inengnengiNdu alu lau, dingen gulbakna litap ibahanNdu. Alu udan megabur ibahanNdu taneh e, janah sinuan si mbaru ertunas ipebelin-belinNdu.

¹²Perbahan liasNdu, ipasu-pasuNdu sinuan-sinuan. Ku ja pe Kam lawes, i je pangan riba-iba.

¹³Mbalmbal dem alu asuh-asuhen, uruk-uruk ermetikken keriahen.

¹⁴Rebe-reben iuisi alu biri-biri berneh-berneh tempa-tempa icabini salu page si megersing. Kerina ersurak, dingen rende perban riahna.