Read Batak Karo MASMUR 66 Bible Online

MASMUR 66 - Batak Karo bible

MASMUR 66

¹Ende-enden. Ersuraklah man Dibata alu meriah, o doni kerina!

²Rendelah dingen pemuliaken gelarNa, pehagalah Ia alu puji-pujin.

³Katakenlah man Dibata, nindu, “Andiko, mejin tuhu perbahanenNdu! Musuh mungkuk i adep-adepenNdu perban biarna, erkiteken kuasaNdu si mbelin.

⁴Kerina doni nembah mungkuk man baNdu, rende ia muji Kam, ipujina gelarNdu.”

⁵Marilah dingen nehenlah si ibahan Dibata, mehantu kal perbahanenNa i tengah-tengah manusia.

⁶IsalihkenNa lawit jadi taneh kerah, nini-nininta erdalan arah e ngepar. E maka meriah ukurta, kerna kerina perbahanenNa. [63†]

⁷Ia me pemerentah si erkuasa seh rasa lalap. IperdiatekenNa bangsa-bangsa maka ola berontak man baNa.

⁸O bangsa-bangsa pujilah Dibata kami, berekenlah puji-pujinndu man baNa.

⁹Ia si njaga kita maka tetap nggeluh, dingen la ipelepasNa kita ndabuh.

¹⁰O Dibata, Kam nguji kami, desken ngane pirak i bas api, bage me kami pengujiNdu.

¹¹IpediatNdu kami kena siding, iberekenNdu man kami baban si seh kal beratna.

¹²IpelepasNdu kami idedehi imbang-imbang kami, ibentasi kami banjir dingen api. Tapi genduari ibabaiNdu kami ku bas ingan kemalemen ate.

¹³Reh aku ku RumahNdu maba persembahen tutungen, dingen kukunduli padanku man baNdu, [64†]

¹⁴padan si kubelasken tupung aku i bas kiniseran.

¹⁵Kupersembahken me man baNdu persembahen tutungen, i bas asuh-asuhen si mburna nari. Kupersembahken man baNdu bajar ras lembu, cimberna nangkih ku langit.

¹⁶Marilah dingen begikenlah, o kam kerina si erkemalangen man Dibata, maka kuturiken man bandu kerna kai si ibahanNa man bangku.

¹⁷Erlebuh aku mindo penampat man baNa, genduari rende aku muji Ia.

¹⁸Bicara aku ersura-sura erbahan si jahat, ugapa pe TUHAN la nggit megiken pertotonku.

¹⁹Tapi enggo ibegiken Dibata aku, ialokenNa pemindonku.

²⁰Kupuji Dibata sabap la itulakNa pertotonku, Ia tetap erkeleng ate man bangku.