Read Batak Karo MASMUR 68 Bible Online

MASMUR 68 - Batak Karo bible

MASMUR 68

¹Masmur Daud; ende-enden.

²Keke Dibata, ihuntakkenNa musuh-musuhNa, kalak si ernembeh ate man baNa lompat i bas Ia nari.

³Ikernepken Dibata ia kerina, desken cimber api bene me ia. Bali ras lilin nehteh i bas api gara, bage me kalak jahat lesap i bas adep-adepen Dibata.

⁴Tapi kalak benar meriah iakapna, ersurak-surak ia i adep-adepen Dibata.

⁵Rendelah guna Dibata, pujilah gelarNa, Ia kap TUHAN, pesikap dalan man baNa, si njadiken embun man geretaNa. TUHAN kap gelarNa, ersuraklah i adep-adepenNa.

⁶Dibata si ringan i bas inganNa si badia, Ia bapa kalak melumang dingen ngkawali diberu balu-balu.

⁷IbereNa ingan man kalak si kelungunen, kalak tutupen iberena kebebasen dingen keriahen. Tapi kalak si ngelawan TUHAN, la banci lang tading i bas taneh tenggiring.

⁸O Dibata, tupung bangsaNdu ibabaiNdu erdalan arah taneh si mesawang,

⁹doni nggirgir, langit ngamburken udan, i adepenNdu, o Dibata deleng Sinai mugur-ugur. [65†]

¹⁰IberekenNdu udan meder, dingen taneh tenggiring ipelimbaruiNdu.

¹¹E maka i je bangsaNdu ringan, i bas kiniulinNdu, o Dibata, kalak musil ipiaraNdu.

¹² TUHAN mereken perentah, e maka nterem diberu-diberu maba berita,

¹³“Enggo kiamen raja-raja ras tenterana, diberu-diberu i rumah mbagi-bagiken barang rampasen.”

¹⁴Tempas nderapati si nilapisi salu pirak, dingen kabengna erndilap-ndilap erkiteken emas murni. (Engkai maka kam tading i bas karang biri-biri tupung paksa erperang?)

¹⁵Deleng Salmon ersinalsal desken salju, tupung si Mada Kuasa engkerapken raja-raja i je.

¹⁶Deleng Basan lanai tanggung ganjangna, deleng e melala ancuk-ancukna.

¹⁷Engkai maka i das ancuk-ancukna si meganjang e, Deleng Basan cian ngenen Deleng Sion, si ipilih Dibata man inganNa tading? I je TUHAN tading seh rasa lalap!

¹⁸Salu gereta si enteguh, buena meribu-ribu, reh TUHAN i Sinai nari ku inganNa si badia.

¹⁹ TUHAN nangkih ku ingan si Meganjangna ingan e jadi inganNa tading; ibabaNa nterem kalak tabanen, i bas pemberontak nari pe ialokenNa persembahen. [66†]

²⁰Pujilah TUHAN tep-tep wari Ia si maba babanta si mberat. Ia kap Dibata si engkelini kita.

²¹Dibatanta kap TUHAN si ngkelini, ipulahiNa kita i bas kematen nari.

²²Ugapa pe iripukken Dibata takal imbangNa, takal kalak si tetap ringan i bas dosa.

²³Nina Tuhan, “BangsangKu, Kubaba imbangndu i Basan nari, Kubaba ia mulih i bas teruh lawit nari,

²⁴gelah iburihindu nahendu salu darehna, dingen biang ndilatca asa puasna.”

²⁵O Dibata, kerina kalak ngidah arak-araken kemenangenNdu Dibata, Rajangku Ia, iarakken ku inganNa.

²⁶Arah lebe erdalan perende-ende, kalak si ngkuit kulcapi arah pudi, i tengah, singuda-nguda malu gendang, bagenda me ende-endenna,

²⁷“Pujilah Dibata i tengah perpulungenNa, pujilah TUHAN, o kesusuren Jakup kerina!”

²⁸Nehenlah, ah suku Benyamin suku si kitikna, adi peminpin Juda lanai alang teremna, arah pudina, erdalan peminpin Sebulon ras Naptali.

²⁹O Dibata, cidahken min gegehNdu, gegeh si ipakeNdu nampati kami bangsaNdu.

³⁰Ibaba raja-rajalah persembahen, guna RumahNdu i Jerusalem.

³¹Rawailah Mesir, rubia si merawa i tengah rengo. Rawailah bangsa-bangsa, rarasen jenggi lembu ras anakna, seh maka nembah erjimpuh ia kerina janah mpersembahken pirak baNdu. Huntakkenlah kalak si merincuh erperang.

³²I Mesir nari ibaba kalak barang tembaga, kalak Sudan ndadaken tan guna ertoto.

³³Rendelah man Dibata, o kerina kerajan, endekenlah ende-enden pujin man TUHAN.

³⁴Ia si mentasi awang-awang, awang-awang si enggo lit nai-nai nari. Begikenlah! Ngerana TUHAN soraNa ergeruhguh alu megang.

³⁵Beritakenlah maka Dibata kap si merentah Israel, i datas awang-awang Dibata erkuasa alu kemulian.

³⁶Andiko, mejin me tuhu Dibata tupung ia ndarat i bas inganNa nari. Dibata nu Israel mereken man bangsaNa gegeh ras kuasa. Pujilah Dibata!