Read Batak Karo MASMUR 69 Bible Online

MASMUR 69 - Batak Karo bible

MASMUR 69

¹I bas Daud nari.

²O Dibata, sampati min aku, enggo aku gedap terjeng kerahungku.

³Gedap aku ku bas kubang si mbages, la lit taneh piher man ingan tedis. Enggo gedah-gedah aku i bas lau si mbages, janah nandangi igedapken galumbang me aku.

⁴Latih kuakap, serko aku mindo penampat, seh maka kerah kalah-kalahku. Meser matangku, ngarap man penampat Dibatangku.

⁵Kalak si ernembeh ate man bangku la ersebap, teremen asang buk i bas takalku. Kalak si atena encedaken aku megegeh kap, iserangna aku alu curang. Ipaksana aku ngulihken erta si la kurampas. [67†]

⁶O Dibata, ietehNdu kap kelepakenku, la kap terligen dosangku man baNdu.

⁷Ola min erkiteken aku, mela iakap kalak si ernalem man baNdu, o TUHAN si Mada Kuasa. Ola pelepas kalak, si nembah man baNdu, o Dibata nu Israel ijuruken erkiteken aku?

⁸Sabap erkiteken Kam kap aku igombangi, erkiteken Kam nge maka mela kuakap.

⁹Aku lanai itandai kade-kadengku, bagi kalak pertandang man keluargangku.

¹⁰Keleng ateku man RumahNdu gurlah bagi api i bas pusuhku, kalak si deban megombang baNdu, tapi aku nge si rate mesui. [68†]

¹¹Kupeteruk diringku alu puasa, tapi megombang kalak erkiteken si e.

¹²Kupake uis guni tanda ate ceda, tapi aku iuru-uru kalak.

¹³Icakapken kalak aku i bas runggun si mabuk-mabuk rende-rende kerna aku.

¹⁴Tapi ertoto aku man baNdu, o TUHAN, paksa si payo iakapNdu, aloi min aku o Dibata. Sabap mbelin kap lias ateNdu, sampati min aku alu keleng ateNdu si tetap.

¹⁵Ola pelepas aku gedap i bas kubang, pulahi min aku i bas imbang ras lau si mbages nari.

¹⁶Ola pediat aku iombakken lau si ergalumbang, ola pelepas aku itelen lubang si mbages, ntah sumur nukupken ayona ku babongku.

¹⁷O TUHAN aloi min aku, sabap mehuli kap keleng ateNdu si tetap. Tulihken min aku, sabap mbelin kap perkuah ateNdu.

¹⁸Ola ibunikenNdu diriNdu nandangi aku suruh-suruhenNdu, aku i bas kesusahen, pedas min sampati aku;

¹⁹Mari min pulahi aku, bebasken aku i bas imbang-imbangku nari.

²⁰Ietehndu uga kalak nggombangi aku, ipemela-melana ras ipeterukna aku. ItandaiNdu kerina imbang-imbangku.

²¹Enggo peltep pusuhku perban megombang kalak bangku, e maka bene ukurku. Kudarami kalak si erkuah ate, tapi la lit, kudarami pengapul, tapi sia-sia.

²²Tupung aku melihe, ibereken kalak bangku racun, tupung aku muas ibereken bangku cuka. [69†]

²³Kena cilakalah ia arah pesta-pestana, cilakalah ia erkiteken pesta agama. [70†]

²⁴Pentangkenlah matana, janah gelgel awakna mesui.

²⁵Curcurilah ia alu rawaNdu, dabuhkenlah tembehNdu man bana.

²⁶Kernepkenlah kerina barung-barungna, maka lanai lit sada pe tading nggeluh i bas kemahna. [71†]

²⁷Sabap isiksana kalak si iukumNdu, dingen isakitina tole kalak si ilukaiNdu.

²⁸Berekenlah man bana ukumen si terberaten, ola ia ibenarken.

²⁹Sasaplah gelarna i bas kitap kegeluhen nari, ola suratken gelarna i tengah kalak si benar. [72†]

³⁰Aku enda itindih dingen ndehereng, e maka angkat min aku, o Dibata, jenari kelini min aku.

³¹Kupuji TUHAN i bas ende-enden. Kuberitaken kemulianNdu alu ngataken bujur.

³²Ngenan ate TUHAN ende-enden pujin asangken persembahen lembu, lembu jarah-jarah si mbur.

³³Ngidah si e, meriah iakap kalak si itindas, nggedang ate kalak si nembah man Dibata.

³⁴Sabap iperdiateken Dibata kap kalak musil, la ilupakenNa kalak si i bas penjara.

³⁵Pujilah Dibata, o langit ras doni, o lawit, ras kerina si nggeluh i je.

³⁶Ia pagi ngkelini Jerusalem, ipantekiNa mulihi kuta-kuta Juda. I je me ringan bangsa TUHAN, negeri e jadi sikerajangenna,

³⁷jenari iwariskenna man anak kempuna, kalak si erkeleng ate man TUHAN i je me ringan.