Read Batak Karo MASMUR 7 Bible Online

MASMUR 7 - Batak Karo bible

MASMUR 7

¹Ende-enden Daud erkiteken Kus kalak Benyamin e.

²O TUHAN, Dibatangku, reh aku ndahi Kam gelah ikawaliNdu; pulahi dingen kelini aku i bas kerina imbang si ngayaki aku,

³adi lang bali ia ras singa si merawa; isarenna me aku ku ingan si la lit kalak si nampatisa, jenari icaing-caingna ngayak melumat.

⁴ [4-5] O TUHAN Dibatangku, adi lit kubahan salah man kalak, adi lit kin kubahan jahat man teman, ntah lit kulakoken si jahat man imbang-imbangku alu la ersabap, adi lit kin kubahan si enda ndai,

⁶adi bage pediatlah imbang-imbangku ngelis aku, dingen ngerigep aku; pelepas imbang-imbangku nampul aku jenari munuh aku janah itadingkennalah aku ampar lanai erkesah.

⁷O TUHAN kekelah i bas rawaNdu, tedislah ngelawan pernembeh musuh-musuhku, kekeken jenari sampati aku. Sabap keadilen kap si ipindonNdu.

⁸E maka pepulunglah kerina bangsa-bangsa ku sekelewetNdu jenari bahanlah maka Kam nghakimi kerina.

⁹O TUHAN, Kam kap Hakim kerina manusia adili min kinibujurenku; ietehNdu kap aku la ersalah.

¹⁰Kam kap Dibata si tuhu-tuhu si pepayo perukuren ras sura-sura kami. Pengadilah kejahaten kalak jahat jenari berekenlah upah man kalak bujur. [10†]

¹¹Dibata kap sekawalku, ikeliniNa kalak si erkemalangen man baNa.

¹²Dibata kap Hakim si bujur dingen tetap ngukum kalak jahat.

¹³Adi kalak jahat la nggit jera, igarut Dibata me pedangNa. IpegestengNa panahna jenari ipanahkenNa,

¹⁴ibuatNa senjata si mahan mate jenari irentangNa alu anak panah si gara.

¹⁵Nehenlah uga kalak jahat ngukurken kejahaten; iukurkenna si jahat, jenari idalankenna tipu.

¹⁶Itogengna siding nidingi kalak, tapi ia jine kena sidingna. [11†]

¹⁷E maka alu kejahatenna jine ia iukum, dingen perbahanenna jine kap si ndumpang ia.

¹⁸Kukataken bujur man TUHAN erkiteken keadilenNa, rende aku muji TUHAN, si Meganjangna.