Read Batak Karo MASMUR 71 Bible Online

MASMUR 71 - Batak Karo bible

MASMUR 71

¹Man baNdu aku cicio, o TUHAN, ola aku pelepas italuken.

²Bebasken min aku sabap bujur kap Kam, dengkehken min aku janah pulahi min.

³Kam min jadi inganku cicio si aman, dingen jadi bentengku si enteguh. Kam kap kecionku ras pertahanenku.

⁴O Dibatangku, pulahi min aku i bas kalak jahat, i bas kuasa kalak jahat dingen si kejam nari.

⁵Kam kap pengarapenku, man baNdu kap aku ernalem kitik-kitikku nari.

⁶Mulai tubuhku ndube ku Kam aku ertunande, i kawaliNdu aku mulai kin i bas bertin nandengku nari e maka lalap Kam kupuji.

⁷Geluhku jadi usihen man nterem kalak, sabap Kam kap pengawalku si megegeh.

⁸Lalap Kam kupuji, kemulianNdu kuberitaken gedang-gedang wari.

⁹Tupung aku enggo metua ola min buangNdu aku, ola aku itadingkenNdu adi enggo keri gegehku.

¹⁰Sabap ibunuh imbangku atena aku, icakapkenna aku dingen erpekat ia.

¹¹Nina, “Enggo itadingken Dibata ia; ota elis jenari sitangkap ia, sabap lanai bo lit si nampatisa.”

¹²O Dibata, ola Kam ndauh i bas aku nari, o Dibatangku, pedas min aku sampati.

¹³Italuken dingen ikernepkenlah, kalak si nerang aku. Igombangi dingen ijurukenlah, kalak si encilakaken aku.

¹⁴Tep-tep Kam lalap pengarapenku, jenari reh usurna kupuji Kam.

¹⁵KiniulinNdu kuturiken gedang-gedang wari, dingen ngerana kerna keselamaten si iberekenNdu aminna pe la kal tertaktaki.

¹⁶ TUHAN kupuji perbahanenNdu si mbisa, kebenarenNdu ngenca ateku kupebelin.

¹⁷Kitik-kitikku nari iajariNdu aku, o Dibata, janah seh ngayak genduari kuturiken perbahanenNdu si mejin.

¹⁸Genduari, o Dibata aku enggo metua dingen ubanen, ola kal aku tadingken. Temanilah aku, maka ngasup aku ermomo kerna kuasa ras kinimbisanNdu, man kerina kesusuren si nandangi reh.

¹⁹KinibujurenNdu, o Dibata, seri ganjangna ras langit, mulia kap perbahanenNdu ise kin bagi Kam?

²⁰Enggo idabuhkenNdu man bangku kiniseran si mberat, tapi gegehku iulihkenNdu me, dingen ipekekeNdu aku i bas kuburen nari.

²¹ItambahiNdu man bangku kemulian, jenari iapuliNdu ka aku.

²²Tuhu kupuji ateKu Kam alu kulcapi, kupuji ateku kesetianNdu o DibatangKu. Alu sora kulcapingku kupersembahken man bandu ende-enden, o si badia nu Israel.

²³Ersurak aku dem keriahen janahku ngendeken ende-enden pujin man baNdu. Geluhku rende ersurak, sabap enggo aku ipulahiNdu.

²⁴Gedang-gedang wari ateku ngerana kerna kebenarenNdu. Sabap kalak si atena meneken aku enggo italuken dingen ijurukenNdu.