Read Batak Karo MASMUR 72 Bible Online

MASMUR 72 - Batak Karo bible

MASMUR 72

¹I bas Salomo nari. Ajarkenlah man raja undang-undangNdu, o Dibata, bereken min man anak raja kebujurenNdu,

²gelah iperentahna bangsaNdu alu adil, dingen irajaina kalak musil alu bujur.

³Dame dingen mehumurlah negeri enda, dingen kerinalah ngenanami kebujuren.

⁴Irungguken rajalah kalak musil alu bujur, isampatinalah kalak si kekurangen italukenlah kalak si nindihsa.

⁵O Dibata isembah bangsaNdulah Kam, kidekah matawari ras bulan ersinalsal denga; kerina kesusuren muji Kam gelah.

⁶Bali min raja ras udan si naktak i bas mbalmbal bagi udan meder ngelitapi juma-juma.

⁷Gelah kebujuren erdalan kidekah geluhna, dingen kemakmuren tetap kidekah bulan ersinalsal.

⁸Mbelang kinirajanNa seh i bas lawit ku lawit, menaken i bas Lau Eprat nari seh ku tampuk doni. [73†]

⁹Kalak si ringan i taneh mesawang nembah man bana, kerina imbang erjimpuh i adepen nahena.

¹⁰Raja-raja Sepanyol ras pulau-pulau, maba luah man bana. Raja-raja Arab ras Etopia, reh mereken persembahen.

¹¹Kerina raja-raja erjimpuh i adepenna, kerina bangsa jadi si erdahinna.

¹²Kalak musil si mindo man bana isampatina, bage pe kalak si kekurangen ras kalak si la lit si nampatisa.

¹³Ikelengina kalak si la ergegeh dingen musil, ikelinina geluh kalak si nggeluh i bas kekurangen.

¹⁴Ibebaskenna i bas penindasen dingen i bas kalak merawa nari, sabap meherga kap geluh kalak e man bana.

¹⁵Mejuah-juahlah raja! Ipersembahkenlah man bana emas i Arab nari. Itotokenlah ia katawari pe, dingen Dibatalah lalap si masu-masu ia.

¹⁶Mbuahlah page i belang-belang negeri, uruk-uruk dem alu ulih juma. Mehumurlah tanehna bali ras deleng-deleng Libanon, dingen penduduk kutana desken dukut i mbalmbal.

¹⁷Tersingetlah gelar raja rasa lalap, kidekah ersinalsal denga matawari, terberitalah ia. Kerina bangsa muji ia gelah, ertotolah ia kerina mindo pasu-pasu i bas Dibata nari, janah ertoto guna kesangapen raja.

¹⁸Terpujilah TUHAN Dibata nu Israel, Ia ngenca si ngelakoken perbahanen si mejin.

¹⁹Terpujilah gelarNa si mulia seh rasa lalap; kerina doni demlah alu kemulianNdu! Amin! Amin!

²⁰Enda me pertoton Daud anak Isai